ჩემპიონთა ლიგის მეოთხედფინალური სტადიის პირველ დაპირისპირებაზე, რომელიც „ჩელსის“ წინააღმდეგ ლონდონში გაიმართა, „რეალს“ დაახლოებით 2000-მდე მადრიდისტა უჭერდა მხარს.

მას შემდედ, რაც ანჩელოტის შეგირდებმა მატჩის სადავეები სრულად ჩაიგდეს ხელთ, სტადიონზე ესპანელი ქომაგების ომახიანი შეძახილები ჭარბობდა. აღსანიშნავია, რომ ისინი არც პოლიტიკურ ფრაზებს ერიდებოდნენ და პერიოდულად სკანდირებდნენ, რომ „გიბრალტარი ესპანეთის ნაწილია.“

ცნობისათვის, გიბრალტარი დიდი ბრიტანეთის ზღვისიქითა ტერიტორიაა, რომელიც 1713 წლის შეთანხმების თანახმად, ესპანელებმა გაერთიანებულ სამეფოს გადასცეს, თუმცა მიუხედავად ამისა, 2 ქვეყანას შორის მასზე დავა დღემდე გრძელდება.