ლონდონში მოპოვებული მნიშვნელოვანი გამარჯვების შემდეგ, კარლო ანჩელოტიმ ჟურნალისტების კითხვებს უპასუხა.

„თავს შესანიშნავად ვგრძნობ. იზოლაციის პერიოდმა სიმპტომების გარეშე ჩაიარა. თითქმის 1 კვირის განმავლობაში არ ვიმყოფებოდი გუნდთან ერთად და დაბრუნების შემდეგ, ფეხბურთელები შესანიშნავ კონდიციებში დამხვდნენ. ჩემმა შეგირდებმა „ჩელსის“ წინააღმდეგ დიდებული წარმოდგენა შემოგვთავაზეს, მათ გამოავლინეს სიმამაცე და ნამდვილი ხასიათი. „რეალი“ მეტოქეზე უკეთესად ბურთაობდა. არ უნდა დაგვავიწყდეს, რომ წინ განმეორებითი დაპირისპირებაა, სადაც ყველაფერი შესაძლებელია მოხდეს.“

„ცხადია, ჩვენი სურვილია ანალოგიურად ვიასპარეზოდ „სანტიაგო ბერნაბეუზეც.“ მოპოვებულ უპირატესობას შენარჩუნება სჭირდება. ის ფაქტი, რომ სტუმრად გატანილ გოლს ყურადღება აღარ ექცევა, მეტოქეს წინქვილზე ასხამს წყალს.“

„ყველაზე მნიშვნელოვანი ელემენტი გახლდათ ის სიმტკიცე, რაც ფეხბურთელებმა დაგვანახეს. ჩვენ დიდებულად ვითამაშეთ უკნიდან და ამასთანავე, ხაზებს შორის. ბენზემასა და ვინისიუსის წყალობით ბრწყინვალედ გამოვიყურებოდით შეტევაშიც. ასეთი ბურთაობით ნებისმიერი გუნდისათვის გვძალუძს წინააღმდეგობის გაწევა.“

„ბენზემას შევადარებდი კარგ ღვინოს. კარიმი დღითიდღე უკეთესი ხდება და გრძნობს, თუ რა მნიშვნელობას იძენს გუნდისათვის, რაც ქმნის ყველა განსხვავებას მასში. მას მეტად მტკიცე ხასიათი აქვს და შეიძლება ითქვას, სამაგალითო პიროვნებაა დანარჩენი ფეხბურთელებისათვის. „ცხრიანი“ სრულყოფილი სპორტსმენია, რომელიც თავისი გოლებითა და თავგანწირული ასპარეზობით დიდად ეხმარება გუნდს. გაგვიმართლა, რომ ბენზემა ჩვენს შემადგენლობაშია.“

„იგივე სისტემით ვხელმძღვანელობდით, უბრალოდ ვალვერდემ დაიწყო სასტარტო შემადგენლობიდან. ეს უკანასკნელი „ჩელსის“ მარცხენა ფრთის გასანეიტრალებლად გამოვიყენეთ და მან წარმატებით გაართვა თავი დაკისრებულ მოვალეობას. ასპილიკუეტა რომ დაცვაში დარჩენილიყო, ფედეს უფრო ხშირად ექნებოდა წინ წასვლის საშუალება. ყოველთვის ვესაუბრები შეგირდებს ფეხბურთზე და პარალელურად ვისმენ მათ აზრებსაც. საბოლოო გადაწყვეტილებას კი მე ვიღებ. ზოგჯერ, მართალი ვარ, ზოგჯერ არა.“

,,ტუხელს ვუთხარი, რომ მისი გუნდი შესანიშნავია, ქომაგებმა კი დიდი სიამოვნება მიიღეს."

„ვალვერდე და ბენზემა დაღლილობის გამო შევცვალე, ხოლო მილიტაომ ჯერ პირველ ტაიმში მიიღო გარკვეული დარტყმა, ხოლო შემდეგ მუხლი დაეჭიმა, შესაბამისად, თამაშის გაგრძელება ვეღარ შეძლო, თუმცა სერიოზული არაფერია.“

„კურტუასთან დაკავშირებით „ჩელსის“ გულშემატკივრებს საკუთარი პოზიცია აქვთ. ხშირ შემთხვევაში მსგავსი ხასიათის დახვედრა ნიშნავს, რომ ფეხბურთელს დიდ პატივს სცემენ. როგორც ყველამ ვნახეთ, ტიბოზე ზეგავლენა არ მოუხდენია არაფერს.“

RealMadrid.Com