კარლო ანჩელოტიმ „ელ კლასიკოს“ წინ პრესკონფერენცია გამართა, სადაც გუნდში არსებულ სიტუაციას, ტრავმებს და გეგმებს შეეხო...

„უდავოდ უნდა ითქვას, რომ „ბარსელონა“ „ელ კლასიკოს“ მოწოდების სიმაღლეზე ხვდება. ჩავის გუნდი შესანიშნავ ფორმაშია, რაზეც კოლექტივის მიერ ბოლო ტურებში ნაჩვენები შედეგებიც მიუთითებს. ფაქტია, კატალონიურმა გრანდმა სატურნირო მდგომარეობა მნიშვნელოვნად გაიუმჯობესა და მადრიდში სულ სხვა ამპლუაში ჩამოდის.“

„ყურადღებით თამაში, მინიმალური რაოდენობის შეცდომების დაშვება, მოტივირებულობა და ტაქტიკური განსწავლულობა გვმართებს.“

„საოცრად უნდა ვითამაშოთ, როგორც დაცვაში, ასევე შეტევაში და მაქსიმუმი გავიღოთ 3 ქულის მოსაპოვებლად.“

„გადამწყვეტი გამარჯვება? ვერ ვიტყვი, რომ „ელ კლასიკოს“ მოგების შემთხვევაში ჩემპიონობას გავინაღდებთ, ვინაიდან საკმაოდ რთული კალენდარი გვაქვს და კიდევ მოგვიწევს დაპირისპირებების ჩვენს სასიკეთოდ დასრულება.“

„ფერლან მენდისთვის „ელ კლასიკოში“ მონაწილეობის მიღება კვირის დასაწყისიდანვე გამორიცხული იყო. ფრანგ ფეხბურთელს ტრავმა აღენიშნება და აღდგენით პროცესს გადის, ის სანაკრებო პაუზის შემდეგ ჩვენს განკარგულებაში იქნება და გუნდის დახმარებას შეძლებს.“

„ბენზემა „ელ კლასიკოში“ მონაწილეობას ვერ მიიღებს, მომდევნო კვირას კი მთლიანად აღდგენით პროცესს დაუთმობს.“

„საერთო ჯამში, „ბარსელონასთან“ მატჩში სერიოზული დანაკლისი გვექნება, მაგრამ არსებობს დამატებითი რესურსი.“

„კარიმს სერიოზული ტრავმა არ აქვს, მაგრამ მისი მოედანზე გასვლა რისკებს შეიცავს, სწორედ აქედან გამომდინარე, ჩემს განკარგულებაში არ იქნება.“

„სასტარტო შემადგენლობა უკვე შევარჩიე, მაგრამ ამას ახლა არ გავამხელ.“

„კატალონიური კლუბი კარგ დინამიკაშია. ამ გუნდს აქვს საკუთარი სტილი, ჩავი კი სწორედ ამას განასახიერებს, დიდ წინააღმდეგობას ველით.“

„ბეილი 9-იანზე ერთ-ერთი ალტერნატივაა, ისე როგორც ლუკა იოვიჩი და მარიანო დიასი. ასევე შესაძლებელია ისკო ალარკონის ცრუ „9“-იანად გამოყენება. როგორც გითხარით, გადაწყვეტილება მიღებული მაქვს, მაგრამ ახლა ამაზე საუბარს არ ვაპირებ.“

„დიახ, ბენზემა დიდი დანაკლისია, მაგრამ „რეალს“ მის გარეშე მოგებაც შეუძლია. ჩვენ ბოლომდე ვიბრძოლებთ და საუკეთესო ვერსიის წარდგენად ვეცდებით.“

„ფრანგი 34 წლის არის და ხანდახან ტრავმიანობს, ეს ბუნებრივია. მთავარი ის არის, რომ ის მოედანზე დაბრუნებას მალევე ახერხებს.“

„სისტემა? მთავარი ის არის, რომ ფეხბურთელებმა საკუთარ პოზიციებზე თავი კომფორტულად იგრძნონ. მე მხოლოდ ეს მსურს და ვფიქრობ, რომ საუკეთესო გამოსავალი ფეხბურთელებისთვის მოსახერხებელ პოზიციაზე დაყენებაა.“

„ყველა ფეხბურთელთან იდეალური ურთიერთობა მაქვს. ბუნებრივია, ის მოთამაშეები, რომლებიც მეტწილად სათადარიგო სკამზე სხედან, მეტს ნერვიულობენ, თუმცა ინდივიდუალურ დონეზე ყველასთან მეგობრობა მაკავშირებს.“

„ნაჩო ძალიან გაწონასწორებული ფეხბურთელი. ფერნანდესი გუნდის კაპიტნის სამკლაურს იმსახურებს და თუ მოედანზე გავა, აუცილებლად იქნება ლიდერის რანგში.“

„ბეილი და ედენ აზარი საკმაოდ კარგად ვარჯიშობენ. ორივე მოთამაშეს შეუძლია „ბარსელონას“ წინააღმდეგ თამაში და გუნდის დახმარება. ვარჯიშებზე მათ გარჯას ვაფასებ.“

„2020 წლის „ელ კლასიკო“, რომელიც ბერნაბეუზე კარგად მახსოვს. იმედი მაქვს, სცენარი იგივე იქნება.“