კარლო ანჩელოტიმ „პსჟ“-სთან გამარჯვების შემდეგ პრესკონფერენცია გამართა...

„ეს იყო ისტორიული ღამე, რომელიც ოქროს ასოებით ჩაიწერება მადრიდის „რეალის“ ქომაგების მეხსიერებაში. ძალიან ბევრი ვიწვალეთ, მაგრამ ანგარიშის გათანაბრების შემდეგ დიდი მუხტი მივიღეთ და ქომაგებმაც საოცარი მხარდაჭერა გამოგვიცხადეს. გუნდმა არნახული ძალისხმევის შედეგად გამარჯვება შეძლო და ჩემპიონთა ლიგის 1/4 ფინალშია.“

„მბაპე ცხოვრებას გვირთულებდა, ამ ფეხბურთელის შესაძლებლობებს მართლაც საზღვარი არ აქვს, მაგრამ გუნდურმა სულისკვეთებამ და შემართებამ მეტოქის კარში 3 გოლი გაგვატანინა. საოცარ ემოციებში ვარ და თავის გაკონტროლება მიჭირს.“

„როტაცია? ცვლილებები მაშინ გავაკეთე, როდესაც საჭირო იყო. ტონის მეტი თამაში აღარ შეეძლო, სწორედ ამიტომ მოედანზე კამავინგა შევუშვი, როდრიგოს ფლანგზე დამატებამ კი სისწრაფე მოგვიტანა.“

„კარიმ ბენზემა მაგიური ფეხბურთელია. ფრანგისგან არასდროს არაფერია გასაკვირი. მან საოცრება შეძლო.“

„ბენზემას და მოდრიჩის თამაში განსაკუთრებით აღსანიშნავია. როგორც ერთმა, ასევე მეორე ფეხბურთელმა გამარჯვებაში უდიდესი წვლილი შეიტანა.“

„ჩემმა გუნდმა კიდევ ერთხელ აჩვენა ხასიათი და ყველას დაუტმკიცა, რომ „რეალისთვის“ დაუმარცხებელი მეტოქე არ არსებობს.“

„მაურისიო პოჩეტინომ გამარჯვება მომილოცა, მე კი მას ვუთხარი, რომ შესანიშნავი გუნდი ჰყავს.“

„ეს არის მაგიური სტადიონი, სადაც „ბლანკოსისთვის“ ყველაფერი შესაძლებელია. კიდევ ერთხელ ვამბობ, რომ ემოციების კონტროლი ურთულესი იყო. ჩვენ წარმოუდგენლად რთული მატჩი მოვიგეთ და ამისთვის ყველა ფეხბურთელს დიდ მადლობას ვუხდი.“