განვლილ უქმეებზე „რეალმა“ ჩემპიონატის ერთ-ერთ აუტსაიდერს უმასპინძლა „სანტიაგო ბერნაბეუზე“ და მინიმალური ანგარიშით დაამარცხა (1-0).

ანჩელოტის შეგირდებმა მორიგი 3 ქულა ჩაიწერეს აქტივში და ლა ლიგის 23-ე ტურის თავზე, უკვე 53 ქულას მოითვლიან. დედაქალაქელებმა მეორეადგილოსანი „სევილიას“ წაბორძიკება (0-0 „ოსასუნასთან“) ნაყოფიერად გამოიყენეს და მათთან სხვაობა 6 ქულამდე გაზარდეს.

ამასთანავე აღსანიშნავია, რომ მესამე პოზიციაზე განწესილი „ბეტისი“ შინაურ კედლებში დამარცხდა „ვილიარეალთან“ (0-2) და ახლა უკვე ისინი 13 ქულით ჩამორჩებიან სატურნირო ცხრილის ლიდერებს.

რაც შეეხება „ბარსელონას,“ „ატლეტიკოს“ ძლევის შემდეგ, ჩავის შეგირდები მე-4-ზე აღზევდნენ. მათსა და მადრიდელების შორის ჰანდიკაპი 15 ქულას შეადგენს, თუმცა კატალონიელებს 1-ით ნაკლები პაექრობა აქვთ ჩატარებული.