მიმდინარე თვე სამეფო კლუბისათვის მეტად დაძაბული და მატჩებით დახუნძლული იქნება. ფაქტობრივად, ანჩელოტის შეგირდებს ყოველ მე-3 დღეს მოუწევთ მოედანზე გასვლა.

„ბლანკოსი“ საფეხბურთო თებერვალს „ატლეტიკთან“ სათასო დაპირისპირებით გახსნის. აღნიშნული პაექრობა ხვალ გაიმართება (თბილისის დროით 4 თებერვალს, 00:30 საათზე) და იმ შემთხვევაში, თუ მადრიდელებმა მოახერხეს ბასკების ბარიერის დაძლევა, მათ კალენდარში დამატებით 2 შეხვედრა ჩაინიშნება. „ლა კოპას“ ნახევარფინალური სტადიის პირველი დუელის გამართვა 9-10 თებერვალს არის დაგეგმილი.

5 თებერვალს, „თეთრები“ „გრანადას“ უმასპინძლებენ „სანტიაგო ბერნაბეუზე,“ ხოლო 12 თებერვალს, „ვილიარეალს“ ესტუმრებიან, რასაც რამდენიმე დღეში ჩემპიონთა ლიგის განახლება და საფრანგეთის დედაქალაქში „პსჟ“-სთან ჯახი მოჰყვება (15 თებერვალს).

19 თებერვალს, მადრიდელები „ალავესს“ მიიღებენ შინ, ხოლო თვის ბოლო მატჩში კი „რაიო ვალეკანოს“ დაუპირისპირდებიან (26-27 თებერვალი).