მადრიდის „რეალის“ ფეხბურთელებმა ლა ლიგის მომდევნო ტურისთვის მზადება დაიწყეს...

„ვალენსიასთან“ მატჩისთვის მოსამზადებლად კარლო ანჩელოტის მხოლოდ 2 დღე აქვს, აქედან გამომდინარე, ვარჯიში დღეიდანვე ინტენსიური იყო.

„ალკოიანოსთან“ სასტარტოში მყოფი ფეხბურთელები სესიის პირველ ნაწილში განსხვავებულად დაიტვირთნენ, შემდეგ კი მწვრთნელის ყველა დავალება შეასრულეს.

გარეთ ბეილი მწვანე მინდორზე მარტო მუშაობდა, დანი კარვახალს კი ისევ პრობლემები აქვს და მხოლოდ სატრენაჟორო დარბაზში გარჯით შემოიფარგლა.

მენდიმ, მოდრიჩმა, ბენზემამ, ვინისიუსმა და კურტუამ სრულფასოვანი დატვირთვა მიიღეს, ისინი „ვალენსიასთან“ 100%-ით მზად იქნებიან.

ანჩელოტიმ ვარჯიშზე დიდი ყურადღება დაუთმო ბურთის ფლობას, სწრაფ შეტევებს, პრესინგს, მოკლე სივრცეში კომბინაციურ თამაშსა და ტაქტიკურ მონახაზებს.

ხვალ კოლექტივი კიდევ ერთხელ შეიკრიბება და ფინალურ სესიას გამართავს.