OK Diario-ს და რამდენიმე გერმანული გამოცემის ცნობით, ერლინგ ჰოლანდმა მიუნხენის „ბაიერნს“ უარი უთხრა. „რეკორდმაისტერმა“ ნორვეგიელ ფორვარდს 5 წლიანი კონტრაქტი შესთავაზა, თუმცა როგორც სჩანს, მოთამაშეს გერმანიის ჩემპიონატში დარჩენა არ სურს...

ჰოლანდის მიზანი მადრიდის „რეალში“ თამაშია, რაც მინო რაიოლამაც ძალიან კარგად იცის, თუმცა ფლორენტინო პერესთან ბოლო დროს გაფუჭებული ურთიერთობა რაიოლას „ფრთების გაშლის“ საშუალებას არ აძლევს.

ამ ეტაპზე ნორვეგიელის ტრანსფერთან დაკავშირებით „ბლანკოსის“ გენერალური დირექტორი, ხოსე ანხელ სანჩესი მუშაობს, რომელიც იტალიელ აგენტს შესანიშნავად იცნობს და საქმიანი ურთიერთობის მრავალწლიანი გამოცდილება აქვს.

ჰოლანდის მიზანი „ბლანკოსში“ თამაში და ასტრონომიული ხელფასის მიღებაა, რაც მთავარ ბარიერს წარმოადგენს.

ზემოაღნიშნული წყაროს ინფორმაციით, „ბლანკოსი“ ერლინგ ოპტიმალურ წინადადებას შესთავაზებს და საბოლოო პასუხს დაელოდება, თუმცა უკვე გამოკვეთილია, რომ ფეხბურთელს ლა ლიგისკენ მიუწევს გული და „მერენგებს“ კონკურენტები ეტაპობრივად სცილდება.