ესპანელმა ნახევარმცველმა შესანიშნავი ფორმა აკრიფა.

„ატლეტიკოსთან“ მატჩის წინ, „რეალის“ სასტარტო შემადგენლობასთან დაკავშირებულ ერთადერთ ინტრიგას წარმოადგენდა ის, თუ ვის ჩააბარებდა ანჩელოტი შეტევის მარჯვენა ფრთას. თამაშამდე 1 საათით ადრე გაირკვა, რომ „როხიბლანკოს“ კარს ასენსიო შეუტევდა.

„ინტერთან“ დაპირისპირებაში იტალიელმა დამრიგებელმა აქცენტი როდრიგოზე გააკეთა, რომელიც ნაყოფიერი ასპარეზობით წარსდგა გულშემატკივრების წინაშე, თუმცა რაც მას დააკლდა, მეორე ტაიმში მოედანზე შემოსულმა მარკომ აანაზღაურა. ამ უკანასკნელმა მატჩის მიწურულს, ბრწყინვალე გასროლით აიღო ჰანდანოვიჩის კარი. „ეს იყო დიდებული გოლი“ - დასძინა ნამატჩევს კარლიტომ, რომელმაც შემდეგ დაამატა: „ორივე ფეხბურთელი კარგად მუშაობს. მათი სასტარტო თერთმეტეულში მოხვედრა დაპირისპირების სტრატეგიაზეა დამოკიდებული. რიგ შემთხვევაში როდრიგოს დარი გახსნილი მოთამაშე გვჭირდება მოედანზე, ხოლო არის პაექრობები, სადაც ასენსიო უფრო მეტ სარგებელს მოიტანს, სიღრმეში შესვლის უნარის დამსახურებით.“

თანაქალაქელების დაცვის სირთულიდან გამომდინარე, ანჩელოტიმ თავის გამოჩენის საშუალება „თერთმეტიანს“ მისცა და ცხადია, არ შემცდარა. მალიორკელმა ჯერ მონაწილეობა მიიღო გუნდის პირველ გოლში, შემდეგ კი თავისი ჯადოსნური მარცხენა ფეხით არც ობლაკი დატოვა დაულაშქრავი.

„რეალის“ დამრიგებელს მეტად მოსწონს სამხრეთ ამერიკელის თავდაცვითი პოტენციალი, მეტოქესთან ერთ-ერთზე ბურთაობა და ასოციაციური თვისებები, თუმცა ის მოიკოჭლებს შედეგიანი დარტყმების კომპონენტში. მიმდინარე სეზონში, როდრიგომ 811 წუთი გაატარა საქმეში, რა პერიოდის განმავლობაშიც 2 გოლითა და 3 გადაცემით გამოიჩინა თავი. რაც შეეხება ასენსიოს, ის 798 წუთში, 6 გოლსა და 2 ასისტს მოითვლის. უფრო დეტალურად, გოესი საშუალოდ ყოველ 160 წუთში, ხოლო მარკო ყოველ 100 წუთში ამწუხრებს მოწინააღმდეგეს.

ფაქტია, რიცხვები ასენსიოს მხარეს იჭერს. თუ ფეხბურთელმა მსგავს რიტმში გააგრძელა პაექრობა, მისი საუკეთესო ვარიანტის დაბრუნება ივარაუდება, რომელიც 2019 წლის ზაფხულის შემდეგ, მიღებული მძიმე ტრავმის გამო გაქრა.

AS