ჩემპიონთა ლიგის 1/8 ფინალურ სტადიაზე, გულშემატკივრები 2 დიდებულ დაპირისპირებას იხილავენ.

განმეორებითი წილისყრის შემდეგ, „უეფას“ ყველაზე პრესტიჟულ ტურნირზე „რეალისა“ და „პსჟ“-ს გზები გადაიკვეთა. როგორც ცნობილია, პირველი თამაში 15 თებერვალს „პარკ დე ფრანსზე“ შედგება, ხოლო განმეორებითი 9 მარტს „სანტიაგო ბერნაბეუზე.“ გუნდებს შორის არსებობს რამდენიმე ფაქტორი, რაც მადრიდელებისა და პარიზელების ჯახს განსაკუთრებულს ხდის.

მბაპე როგორც მადრიდისტა?

უკვე 1-ლი იანვრიდან, კილიანს თავისუფლად შეუძლია მოლაპარაკებების წარმოება სასურველ გუნდთან და კონტრაქტის გაფორმება. შესაძლებელია, 1/8 ფინალური ეტაპის პირველ პაექრობამდე, მბაპემ გარკვეულ შეთანხმებასაც მიაღწიოს „ბლანკოსთან.“ როდესაც ფრანგი უკანასკნელად გამოჩნდა „სანტიაგო ბერნაბეუზე,“ მას ადგილობრივმა პუბლიკამ აპლოდისმენტები მიუძღვნა.

რამოსის დაბრუნება

თუ ჯანმრთელობის პრობლემებმა არ შეაწუხა, ანდალუსიელი მცველი სასტარტო შემადგენლობიდან დაიწყებს ბრძოლას ყოფილი გუნდის წინააღმდეგ. მისი დაბრუნება „რეალის“ საფეხბურთო არენაზე ნამდვილად ისტორიული იქნება და საინტერესოა, როგორ შეხვდებიან ლეგენდას მადრიდისტები. მიმდინარე სეზონის დიდი ნაწილი სერხიოს ტრავმის გამო გაუცდა.

მესი კიდევ ერთხელ „ბერნაბეუზე“

ალბათ, „ბარსელოდან“ გადაბარგების შემდეგ ვერავინ წარმოიდგენდა, რომ არგენტინელისა და „რეალის გზები ასე მალე გადაიკვეთებოდა.

ალ-ხელაიფისა და პერესის შეხვედრა

მბაპეს ტრანსფერთან დაკავშირებული სიტუაციის გამო, კლუბების ურთიერთობა მნიშვნელოვნად გაუარესდა. ამ ეტაპისათვის უცნობია, მატჩების მიმდინარეობისას, საპრეზიდენტო ლოჟაში ერთად ისხდებიან თუ არა შეიხი და დონ ფლორენტინო.

კეილორ ნავასი

წლების განმავლობაში კოსტარიკელი მეკარე დიდი პოპულარობით სარგებლოდა მადრიდელ გულშემატკივრებს შორის. როდესაც მან ბოლოს იასპარეზა „ბერნაბეუზე,“ საკმაოდ დიდი სითბო მიიღო ინჩასებისგან.

აშრაფი სახლში

მაროკოელი ფესვების მქონე მოთამაშესათვის უიღბლო გამოდგა „ინტერის“ რიგებიდან „რეალთან“ პაექრობა, მაგრამ ახლა უკვე პარიზული კლუბის მაისურით შეეცდება სიტყვის თქმას. ჰაკიმს არასოდეს დაუმალავს, რომ სამეფო გუნდში თავის დამკვიდრება მის ოცნებას წარმოადგენს.

აზარის რევანში

შეიძლება ბევრს არ ახსოვდეს - ბელგიელი ფეხბურთელის მადრიდული კოშმარი სწორედ „პსჟ-“ს წინააღმდეგ დაიწყო, როდესაც თანამემამულე მუნირმა მას ტერფი დაუზიანა. აღნიშნულის შეხვედრის შემდეგ, ედენი ვერადავერ ახერხებს შესაძლებლობების გამოვლენასა და ნიჭის რეალიზებას.

ლეონარდოს თავდასხმა „რეალზე“

„ლურჯების“ სპორტულმა დირექტორმა მკაცრად გააკრიტიკა „ბლანკოსი“ მბაპეს გადაბირების მცდელობასთან დაკავშირებით და „ფიფას“ „რეალის“ ტურნირებიდან მოხსნაც კი მოსთხოვა. ერთობ საინტერესოა, გაბედავს თუ არა ის ესპანეთის დედაქალაქში ჩასვლას.

ვინისიუსი „პსჟ“-ს ოცნება...

სწორედ ლეონარდომ აღიარა, რომ ძალიანს მოსწონს ბრაზილიელი შემტევის ასპარეზობა. ვინის იმ გუნდის წინააღმდეგ მოუწევს ბურთაობა, რომელიც მისი დაბევების სურვილს გამოთქვამს.

MARCA