„რეალ სოსიედადთან“ მიღებული ტრავმის შემდეგ, კარიმ ბენზემამ მადრიდულ დერბიმდე გამოჯანმრთელება მოასწრო და გამარჯვების გოლიც ჩაიწერა აქტივში.

მიმდინარე კალენდარული წლის განმავლობაში, ფრანგმა თავდამსხმელმა 36-ედ გამოიჩინა თავი „რეალის“ რიგებში, რითაც პირადი რეკორდი გააუმჯობესა. აქამდე, მისთვის საუკეთესო მაჩვენებელი გახლდათ 35 შედეგიანი დარტყმა (2019 წელს).

საერთო ჯამში, სანაკრებო პაექრობების ჩათვლით, ბენზემა 45 გოლს მოითვლის. 2021 წელს, მასზე მეტჯერ მხოლოდ შემდეგ ბომბარდირებს ჰყავთ მეტოქე დამწუხრებული: რონალდუ (46 გოლი), ჰალანდი (47), მბაპე (49) და ლევანდოვსკი (66).

ახალი წლის დადგომამდე, კარიმს კიდევ 2 შეხვედრაში მოუწევს მონაწილეობის მიღება („კადისთან“ და „ატლეტიკთან“) და კარგი შანსი ექნება, რომ მონაგარი გაზარდოს.