ემილიო ბუტრაგენიომ მადრიდის „რეალისა“ და „ატლეტიკოს“ დაპირისპირება შეაფასა. „ბლანკოსის“ ინსტიტუციონალური ურთიერთობების დანაყოფის დირექტორმა ვინისიუს ჟუნიორს ბრილიანტი უწოდა...

„ძალიან გვიხარია ის შემართება, რომელიც გუნდს აქვს. გვიხარია და ბედნიერს გვხდის სავსე ბერნაბეუ, რომელიც საყვარელ გუნდს მხარს უჭერს. ჯერ კიდევ დეკემბერია და ყველაფერი წინ გვაქვს, თუმცა მადრიდის „რეალმა“ არნახული პროგრესი აჩვენა და ლა ლიგაში დამაჯერებელი შედეგები აქვს.“

„გუნდმა აჩვენა სიმწიფე, ჩვენ 100%-იანი სიზუსტით გამოვირჩეოდით. ვთვლი, რომ „ბლანკოსში“ ყველა რგოლი დაბალანსებულია, რაც ერთობლივი, გუნდური ძალისხმევის შედეგია. ფეხბურთელები თავგანწირვით თამაშობენ, რაც ყველა მომენტში სჩანს.“

„ვინისიუსი „რეალის“ ბრილიანტია. ახალგაზრდა შემტევმა დღეს ორი საგოლე გადაცემა გააკეთა და მისი მარგი ქმედების კოეფიციენტი ძალიან მაღალი იყო. იმედი მაქვს, ჟუნიორი მსგავს პროგრესს განაგრძობს, ის გუნდის შეუცვლელი წევრია და ანჩელოტის ფორმაციაში უდავო ლიდერის სტატუსს ირგებს.“

„დიახ, „ბარსელონასთან“ და „ატლეტიკოსთან“ საკმაოდ კომფორტული სხვაობა შევქმენით, მაგრამ როგორც ზემოთ აღვნიშნე, ჯერ კიდევ ბევრი რამ არის წინ.“

„ანჩელოტი ბრძენია, მან იცის როგორ უპასუხოს გამოწვევებს. იტალიელმა სპეციალისტმა „ბლანკოსში“ სიტუაცია მნიშვნელოვნად შეცვალა. გუნდი წინ მიდის, რაც თვალნათლივია.“