ტიბო კურტუა მადრიდული დერბის საუკეთესო მოთამაშედ დაასახელეს. ბელგიელმა კარის დარაჯმა „ატლეტიკოსთან“ მოპოვებულ გამარჯვებაზე ისაუბრა.

„კარგი შეხვედრა გამოდგა. შესანიშნავი ზუსტი დამრტყმებით დავამწუხრეთ მეტოქე და 90 წუთის განმავლობაში ვაკონტროლებდით სადავეებს. მეორე გოლის ეპიზოდში, ბურთი უკანა ხაზიდან წავიღეთ ეფექტურად, რასაც შედეგიც მოჰყვა. ვფიქრობ, „ატლეტიკო“ სათანადოდ გვყავდა შესწავლილი. აღნიშნული გამარჯვება ფეხბურთელებისა და სამწვრთნელო შტაბის ერთობლივი მუშაობის ნაყოფია.“

„გუნდი ნაყოფიერად მოქმედებდა დაცვითი ფუნქციების შესრულების დროს. მიჯრით მე-4 პაექრობაში ვახერხებთ კარის მშრალად შენახვას. საერთო ჯამში დიდებულად გავისარჯეთ და ახლა საჭიროა ტემპის შენარჩუნება. მომდევნო დაპირისპირებამდე გარკვეული დრო გავქვს დასვენებისათვის. „კადისი“ გადარჩენისათვის იბრძვის, მაგრამ მიუხედავად ამისა, ადვილ გასეირნებას არ ველოდებით.“

„როდესაც ვინიმ მადრიდული კარიერა დაიწყო, მხოლოდ 18 წლის იყო, თუმცა იმთავითვე ვიცოდით, რომ ტოპ მოთამაშესთან გვქონდა საქმე. ხშირ შემთხვევაში, ბრაზილიელი არასწორ გადაწყვეტილებებს იღებდა, თუმცა ბოლო პერიოდის განმავლობაში დიდი პროგრესი განიცადა და შეიძლება ითქვას, მომწიფდა.“

„კროოსმა და მოდრიჩმა დიდებულად იასპარეზეს. მათი რთული პასები ხაზებს შორის მეტად შტამბეჭდავი სანახაობა გამოდგა. ორივემ თავდაუზოგავად იმუშავა.“

„რა თქმა უნდა, პატივი უნდა ვცეთ მოწინააღმდეგეს. ჯერ არაფერი დასრულებულა. „სევილია“ და „ბეტისი“ ნაყოფიერად ბურთაობენ და მხოლოდ რამდენიმე ქულით ჩამოგვრჩებიან. „ატლეტიკოსთან“ და „ბარსელონასთან“ ჰანდიკაპის გაზრდა კი ყოველთვის სასიამოვნოა. მოდუნების საშუალება არ გვაქვს, ვინაიდან ცუდად იმოქმედებს.“

RealMadrid.Com