„სევილიას“ მთავარმა მწვრთნელმა, ხულიენ ლოპეტეგიმ ფლორენტინო პერესთან სატელეფონო კომუნიკაცია დაამყარა. ესპანური გამოცემების ცნობით, ანდალუსიელთა დამრიგებელმა პერესთან ახლო ურთიერთობა გამოიყენა და ორი მადრიდელის სამხრეთ ესპანეთში ტრანსფერი ითხოვა...

ლოპეტეგის ისკო ალარკონისა და ანტონიო ბლანკოს კანდიდატურები აინტერესებს და თვლის, რომ ორივე მოთამაშე „სევილიას“ რიგებში დიდ წარმატებას მიაღწევს.

ხულიენს ისკოსთან 4 წლიანი კონტრაქტის გაფორმება სურს, ბლანკოსთან კი საიჯარო შეთანხმებაზეც თანახმაა, ვინაიდან იცის, რომ ახალგაზრდა ნახევარმცველზე მადრიდში დიდ იმედებს ამყარებენ.

ლოპეტეგი ფლორენტინო პერესს გარანტიას აძლევს, რომ ბლანკო მოედანზე ხშირად გამოჩნდება და საკმაოდ დიდი პრაქტიკა ექნება, რაც „ბლანკოსის“ ინტერესშიც შედის.

რაც შეეხება ისკოს. მოთამაშე სულ რაღაც 6 თვეში თავისუფალი აგენტის სტატუსს მიიღებს, თუმცა ლოპეტეგის სურს, რომ მოთამაშესა და „რეალს“ შორის იანვარში კონტრაქტის 6 თვით ადრე გაწყვეტაზე შეთანხმება შედგეს და ალარკონმა სეზონის მეორე ნაწილი უკვე „სევილიას“ რიგებში გაატაროს.