როგორც იცით, „ვილიარეალის“ წინააღმდეგ, „მანჩესტერ იუნაიტედს“ მაიკლ კერიკი ხელმძღვანელობდა.

ნორვეგიელი მთავარი მწვრთნელის „წითელი ეშმაკების“ რიგებიდან დათხოვნის შემდეგ, დროებით, სწორედ ინგლისელს უწევს მოვალეობის შესრულება, რომელიც თავის დროზე, ახლოს იყო „რეალში“ გადაბარგებასთან.

2006 წელს, სამეფო კლუბის საპრეზიდენტო არჩევნების წინ, ლორენცო სანსი რამდენიმე ფეხბურთელის მოყვანას ჰპირდებოდა გულშემატკივრებს და მათ შორის იყო კერიკიც: „ჩვენ უკვე 5 მოთამაშესთან და მათ კლუბებთან გვაქვს შეთანხმება, რომელსაც სისრულეში მოვიყვანთ გუნდის სათავეში მოსვლისთანავე. ერთ-ერთი სპორტსმენთაგანია მაიკლ კერიკი. ის 24 წლის ნახევარმცველია, რომელიც ინგლისის ნაკრებში ლამპარდის გვერდით ირჯება და გამოირჩევა კვალიფიციურობით“ - აცხადებდა სანსი.

აღსანიშნავია, რომ „მანჩესტერის“ ლეგენდის პარალელურად, ესპანელ ბიზნესმენს, ემერსონის, ზამბროტას (ორივე „იუვენტუსი“), გაგოს („ბოკა ხუნიორსი“) და ბულარუზის („ჰამბურგი“) ტრანსფერები ჰქონდა მხედველობაში. ის ასევე ვისენტე დელ ბოსკეს დაბრუნებასაც გეგმავდა.

საბოლოოდ, კენჭისყრის შედეგების მიხედვით, ლორენცო მე-4 ადგილზე გავიდა, ხოლო „სანტიაგო ბერნაბეუზე“ რამონ კალდერონმა დაიდო ბინა. მაიკლ კერიკი კი „ტოტენჰემიდან“ ფერგიუსონის განკარგულებაში გადაბარგდა - 464 თამაში „ოლდ ტრაფორდზე,“ 24 გოლი და 37 ასისტი.

MARCA