კარლო ანჩელოტიმ მოლდოვაში პრესკონფერენცია გამართა...

„ჩვენ „შერიფთან“ მატჩში ცუდი გამოცდილება მივიღეთ. თუ აქ გამარჯვება გვსურს, 90 წუთის მანძილზე ზუსტი და მიზანმიმართული ფეხბურთი უნდა ვითამაშოთ. მადრიდში საკმაოდ აგრესიულად ვუტევდით, მაგრამ დავმარცხდით, ახლა კი მხოლოდ მოგება დაგვაკმაყოფილებს, რომელიც თავის მხრივ, 1/8 ფინალის საგზურს გაგვინაღდებს.“

„მილიტაოს და როდრიგოს არანაირი პრობლემა არ აქვთ და ჩვენთან ერთად იქნებიან. როტაცია გარდაუვალია, ამ ქმედებით ერთი მხრივ ფეხბურთლეებს ეძლევათ შანსი, მეორე მხრივ კი, მოთამაშეები ისვენებენ და ძალებს ზოგავენ.“

„„რეალის“ მწვრთნელობა ჩემთვის ზეწოლასთან არ ასოცირდება. ვამაყობ, რომ „ბლანკოსის“ სათავეში ვარ. სჯობდეს ფლობდე ფერარის მარკას, ვიდრე ფიატს.“

„გასახდელში ჰარმონიაა. გამოცდილი ფეხბურთელები ახალგაზრდებს ძალიან ბევრს ასწავლიან და ცდილობენ, რომ სწორ გზაზე დააყენონ.“

„ტირასპოლის კლუბის არენა ვიხილე და მოხიბლული დავრჩი. სტადიონი მართლაც შესანიშნავ კონდიციაშია და ამ მხრივ არანაირი პრობლემა არ გვექნება. ჩვენ 4 საათი ვიფრინეთ, თუმცა ყველაფერმა კომფორტულად ჩაიარა.“

„მეტოქემ „ბერნაბეუზე“ გაგვაოცა, ახლა კი ყველაფერს გავაკეთებთ რევანშის ასაღებად. ეს მარტივი არ იქნება, მაგრამ ცდას არ დავაკლებთ.“

„ისკოსთან პრობლემა არ მაქვს, ის პროფესიონალია და რა თქმა უნდა, ყოველთვის უნდა მოედანზე ყოფნა. ესპანელს უდიდესი გამოცდილება უმაგრებს ზურგს და საჭირო მომენტში მოედანზე გადამწყვეტი ფუნქციის შესრულება შეუძლია. წინა მატჩზე ბევრ საუბარს არ ვაპირებ, ის ხურდებოდა და მოედანზეც შევუშვი.“

„კურტუა დიდებული კიპერია. ევროპაში არაერთი ეფექტური კარის დარაჯი მოღვაწეობს, მაგრამ ბელგიელს ერთ-ერთ საუკეთესოდ მივიჩნევ, მისთვის მთავარი კოლექტიური ჯილდოებია და არა ინდივიდუალური.“

„ზიდანის „პსჟ“-ში ან სხვა კლუბში დანიშვნაზე არაფერი მსმენია. თუ ის პარიზში დაინიშნება, მბაპეს მომავალთან პარალელის გავლება გამიჭირდა, ეს ერთმანეთისგან დამოუკიდებელი საკითხია. ფრანგ ლეგენდას ყველგან წარმატებებს ვუსურვებ, მაგრამ ახლა არანაირ ინფორმაციას არ ვფლობ და მხოლოდ ჩემი გუნდის წარმატებაზე ვარ კონცენტრირებული.“

„რობერტო კარლოსი „რეალის“ ლეგენდა და სიმბოლოა, ის „შერიფის“ წინააღმდეგ არ ითამაშებს (იცინის). ბრაზილიელი კლუბის ელჩის მოვალეობას ასრულებს და საკმაოდ კარგი შედეგები აქვს.“

„არ ვფიქრობ, რომ ეს ვინისიუს ჟუნიორის პიკია, ის კიდევ განვითარდება და პროგრესს გვიჩვენებს. ვინი დიდებული ფეხბურთელია, რომელსაც არნახული ტექნიკური არსენალი ეხმარება, რომ უფრო ეფექტური იყოს. რაც მთავარია, ბრაზილიელი ყოველთვის იჩენს თავმდაბლობას და ცდილობს, სხვებისგან ბევრი ისწავლოს. ყველას არ შეუძლია ის, რაც „რეალის“ ახალგაზრდა შემტევს.“