ჟულიო ბაპტიშტამ სამეფო კლუბზე, მადრიდში მიმდინარე მოვლენებსა და ზოგადად ესპანურ ფეხბურთზე ისაუბრა...

„როდესაც ფეხბურთელი ხარ და შემდეგ სამწვრთნელო საქმიანობას იწყებ, მეტი პატივისცემის მოხვეჭა გჭირდება, თუმცა ძველი სტატუსი ყველაფერში გეხმარება. ახალგაზრდებთან მუშაობა განსაკუთრებულ სპეციფიკას მოითხოვს და მარტივი არ არის. შენ მუშაობ მოთამაშესთან, რომელიც პროფესიონალი უნდა გახდეს.“

„რონალდო „ვალიადოლიდის“ პრეზიდენტია და დიდი გეგმები აქვს, ის შესანიშნავი ადამიანია. მაქსიმალურად ვცდილობ, ჩემი პროექტებით და მუშაობით „კიჭას“ დიდი დახმარება გავუწიო.“

„როდესაც საქმე დანი ალვეშს ეხება, ასაკზე საუბარი უნდა დასრულდეს. დიახ, „ბარსელონამ“ მისი სახით მსოფლიოს ერთ-ერთი ყველაზე გამოცდილი ფეხბურთელი დაიბრუნა. ეჭვი არავის ეპარება, რომ ალვეში ყველა მატჩს არ ითამაშებს და მუდმივად 90 წუთს არ გაატარებს მწვანე მინდორზე, მაგრამ მნიშვნელოვან დაპირისპირებებში, სადაც სათამაშო კლასი და გამოცდილება ფასდაუდებელია, დანის როლი ძალიან დიდი იქნება.“

„ვინისიუს ჟუნიორის პროგრესი აშკარაა, მას საუკეთესო სეზონი აქვს. მოთამაშეს მადრიდთან ადაპტაცია გაუჭირდა და ეს ბუნებრივიც იყო, ის მოხვდა ახალ ქალაქში, ახალ ქვეყანაში, სადაც სულ სხვა მენტალობა იყო, პასუხისმგებლობა კი გეომეტრიული პროგრესიით იზრდებოდა. მიხარია, რომ ჟუნიორს ახლა კარგი ეპოქა აქვს, ის კიდევ მოუმატებს და ეცდება, რომ „რეალის“ ისტორიაში“ წარუშლელი კვალი დატოვოს.“

„კარგად ვიცნობ ესპანეთის ლა ლიგას და მადრიდის „რეალის“ მიღწევებს. ამ გუნდისგან ყოველთვის ყველაზე მეტს ითხოვენ. მიმდინარე სეზონში კარლო ანჩელოტის გუნდი უმთავრესი ფავორიტის სტატუსს ფლობს, რაც ზეწოლას კიდევ უფრო ზრდის.“