21 ნოემბერს, მადრიდის „რეალის“ მეტოქე „გრანადა“ იქნება. დიახ, სანაკრებო შეკრებები მალე დასრულდება და კარლო ანჩელოტი „ბლანკოსის“ მომზადებას სრულფასოვნად დაიწყებს, მანამდე კი გადავხედოთ მოწინააღმდეგის საშინელ სტატისტიკას და სატურნირო მდგომარეობას, რაც მადრიდისტებს ნამდვილად მოგვცემს ოპტიმიზმის საშუალებას...

ლა ლიგაში გამართულ 12 დაპირისპირებაში „გრანადამ“ მხოლოდ 11 ქულას მოუყარა თავი და მე-17 პოზიციაზე იმყოფება, ეს გუნდი გასავარდნ ზონასთან ყველას ახლოს არის. 2 გამარჯვება, 5 ფრე და 5 წაგება - სწორედ ეს არის გრანადელთა მონაგარი, რომელიც სახარბიელოდ ვერცერთ ვარიანტში ვერ ჩაითვლება.

ასევე აღსანიშნავია, რომ გუნდი გოლების კომპონენტშიც სერიოზულად მოიკოჭლებს. 12 თამაშში 11 გოლი ნამდვილად კატასტროფული შედეგია. გამოდის, რომ კოლექტივი თითო მატჩში საშუალოდ ერთი გოლის გატანასაც ვერ ახერხებს.

რაც შეეხება გაშვებულ გოლებს, გრანადელების კარის აღება მეტოქე გუნდებმა 16-ჯერ მოახერხეს.

მოპოვებული 11 ქულიდან გუნდმა 5 საშინაო არენაზე დააფიქსირა, ხოლო 6 საგარეო მატჩებში.

ყოველივე ზემოაღნიშნულიდან გამომდინარე, თამამად შეგვიძლია დავასკვნათ, რომ ანჩელოტის გუნდს სანაკრებო პაუზის შემდეგ მძიმე მეტოქე არ ეყოლება და „ბლანკოსმა“ „Los Carmenes“-იდან აუცილებლად უნდა წამოიღოს 3 ქულა.