სერბმა ფეხბურთელმა, რომელიც ამჟამად ეროვნული ნაკრების განკარგულებაში იმყოფება, მომავალთან დაკავშირებით გადაწყვეტილება მიიღო.

იოვიჩის ოცნებად რჩება მადრიდული კარიერაში წარმატების მიღწევა, თუმცა არსებული რეალობიდან გამომდინარე, მას განზრახული აქვს ზამთრის სატრანსფერო ფანჯარაზე კლუბის დროებით დატოვება.

კარლო ანჩელოტი ფორვარდისადმი ნდობას საერთოდ არ გამოხატავს. მიმდინარე სეზონში, ლუკამ შესაძლო 1440-დან, მხოლოდ 95 წუთი გაატარა მწვანე მინდორზე, რაც 6 პრცენტს უდრის. ლოგიკურია, რომ მოთამაშეს სათადარიგო სკამზე ჯდომა მოწყინდა და სათამაშო წუთების მისაღებად, სხვაგან აპირებს წასვლას.

იოვიჩისათვის ერთ-ერთ მნიშვნელოვან ფაქტორად გამოდგა „ელჩესთან“ დაპირისპირება, როდესაც ბენზემას არყოფნის პირობებში, მაინც არ მიეცა თავის გამოჩენის საშუალება. იტალიელმა სპეციალისტმა მის ნაცვლად მარიანო ჩართო საქმეში. არადა 3 წლის წინ, მადრიდელებმა 60 მილიონი ევრო გადაიხადეს მის სნააცვლოდ, რასაც წინ უძღოდა საკმაოდ ფეერიული სეზონი „აინტრახტის“ შემადგენლობაში - 48 შეხვედრაში 27 გოლი.

სამწუხაროდ, სერბმა ვერადავერ მოახერხა „სანტიაგო ბერნაბეუზე“ თავის დამკვიდრება. აღნიშნული პერიოდის განმავლობაში, ბუნდეს ლიგის ყოფილმა ბინადარმა, 39 თამაშში მიიღო მონაწილეობა და მხოლოდ 2 შედეგიანი დარტყმის განხორციელება შეძლო. ამასთან, განვლილ სეზონში, ნახევარი წლით განათხოვრებული იყო ფრანკფურტულ კლუბში.

La Gazzetta dello Sport-ის ინფორმაციით, ფეხბურთელისადმი ინტერესს მილანის „ინტერი“ გამოხატავს. პარალელურად, მას „არსენალის“ წარმომადგენლებიც აკვირდებიან, თუმცა ამ დრომდე, ლუკას აგენტს არანაირი შეთავაზება არ მიუღია.

AS