პეპე ბორდალასმა მადრიდის „რეალთან“ მატჩის წინ ვითარება მიმოიხილა და განაცხადა, რომ მისი გუნდი მოედანზე მოსაგებად გავა.

„ჩვენ კარგად ვიცით, რა დონის გუნდთან გვიწევს დაპირისპირება, მაგრამ არანაირი შიში არ გვაქვს. „მესტალიაზე“ იმისთვის გავალთ, რომ 3 ქულა მოვიპოვოთ და ტურნირის ერთპიროვნული ლიდერები გავხდეთ. პატივს ვცემთ „რეალს“, ამ გუნდის სიძლიერეს და გამოცდილებას, მაგრამ ვიცით, რომ გამარჯვება შეგვიძლია.“

„ფეხბურთელებს უყვართ თავიანთი საქმე, ისინი პატივს სცემენ ქომაგებს და „ვალენსიას“ დიდ ტრადიციას. ფრე არ იქნება დამაკმაყოფილებელი შედეგი, ჩვენ მხოლოდ გამარჯვებაზე ვიფიქრებთ.“

„არამხოლოდ „ბლანკოსს“, არამედ ყველა მეტოქეს პატივს ვცემთ, თუმცა ჩვენს იდეოლოგიას და ტაქტიკას ვერცერთი მოწინააღმდეგე ვერ შეცვლის. „ვალენსია“ სტილს არ უღალატებს და მაქსიმალურად ეცდება საუკეთესო შედეგის მოპოვებას.“