იტალიური გამოცემების ცნობით, ტურინის „იუვენტუსი“ მადრიდის „რეალისთვის“ წინადადებას ამზადებს. იტალიელები კრიშტიანო რონალდუს შემცვლელს საგანგებო რეჟიმით ეძებენ.

„ბებერი ქალბატონის“ ხელმძღვანელობა ედენ აზარით ინტერესდება. არსებობს ორი პირობა, ერთი იჯარას ითვალისწინებს, სადაც ტურინულ გრანდს გამოსყიდვის უფლებაც ექნება, ხოლო მეორე სრული კონტრაქტის გაფორმებას.

ზაფხულში არაერთი გავრცელდა ინფორმაცია იმის შესახებ, რომ ფლორენტინო პერესი სასურველი წინადადების მიღების შემთხვევაში ბელგიელ ფეხბურთელს გაყიდდა.

დაუდასტურებელი ინფორმაციით, სამეფო კლუბი ედენის სანაცვლოდ 50 მილიონ ევროს ითხოვს. თუ „შავ-თეთრები“ ამ მოთხოვნას დააკმაყოფილებს, საერთოდ არ იქნება გასაკვირი, რომ ისედაც სიურპრიზებით სავსე სატრანსფერო ფანჯარა ასევე დიდი სიურპრიზით დაიხუროს და ბელგიელმა შემტევმა თავი სერია „ა“-ში ამოყოს.