კარიმ ბენზემამ დღეს მადრიდის „რეალთან“ კონტრაქტი კიდევ ერთხელ გაახანგრძლივა და „ბლანკოსის“ რიგებში მინიმუმ 2023 წლის 30 ივნისამდე დარჩება. კარიერა, რომელიც ფორვარდმა მადრიდში 2009 წელს დაიწყო, მართლაც შთამბეჭდავია.

ფრანგის დებიუტი 2009 წლის აგვისტოს ბოლოს „დეპორტივოს“ წინააღმდეგ შედგა. ბენზემამ ჯამურად 560 მატჩს მოუყარა თავი, სადაც 281 გოლის გატანა შეძლო.

ბენზემას ანგარიშზე „რეალში“ 19 ტიტულია, საიდანაც 4 ჩემპიონთა ლიგის თასი გახლავთ, ასევე 4 მსოფლიო საკლუბო ჩემპიონატი, 3 ევროპის სუპერთასი, 3 ლა ლიგა, 2 სამეფო თასი და 3 ესპანეთის სუპერთასი.

როგორც აღვნიშნეთ, ბენზემა 281 გატანილ გოლს მოითვლის და 9 გოლით ჩამორჩება ლეგენდარულ სანტილიანას, რომელიც საუკეთესო ბომბარდირთა შორის მეოთხე პოზიციას იკავებს.

ასევე უნდა აღინიშნოს, რომ ბენზემა „რეალში“ ჩატარებული მატჩების მიხედვითაც ისტორიულ ათეულშია.