ბრიტანული გამოცემების ცნობით, მანჩესტერ „იუნაიტედმა“ უკვე გამოითხოვა რაფაელ ვარანის სამედიცინო დასკვნა. კვლევები მაშინ ჩატარდა, როდესაც ფრანგი სამეფო კლუბს დაუბრუნდა. მიუხედავად იმისა, რომ ვარანი ჯანმრთელია, ის მანჩესტერში მაინც გაივლის დამატებით კვლევებს.

ინგლისელები იუწყებიან, რომ „იუნაიტედში“ უკვე დაიწყო სამზადისი, რომელიც მცველის სამედიცინო შემოწმებას უკავშირდება.

„წითლები“ ვარანის გრანდიოზული წარდგენისთვისაც ემზადებიან. დადასტურებული ინფორმაციით, ვარანსა და „მანჩესტერს“ შორის 5 წლიან კონტრაქტზე არსებობს შეთანხმება.

მიუხედავად ყველაფრისა, ვარანი დღეს დილით „ბლანკოსის“ საწვრთნელ ბაზაზე გამოცხადდა და სესიაში მონაწილეობა მიიღო, თუმცა ესპანეთში ეჭვობენ, რომ ეს ვარჯიში ვარანის მადრიდულ კარიერაში ბოლო გახლდათ.