ჩოლო სიმეონეს განცხადებით, მისთვის ბოლო დროის ერთ-ერთი საუკეთესო ტრანსფერი მარკოს ლორენტეა, თუმცა „ატლეტიკო“ გაჩერებას არ აპირებს და ძალიან გაძლიერდება.

„ჩვენ ბევრისთვის შეუძლებელი შევძელით და ლა ლიგას ჩემპიონის სტატუსით დავიწყებთ. ვიცით, რომ უდიდესი გამოწვევის წინაშე ვდგავართ და „რეალი“-„ბარსელონას“ დუეტი ბოლომდე ეცდება პრობლემების შექმნას.“

„ბოლო წლების ერთ-ერთი საუკეთესო ტრანსფერი მარკოს ლორენტეა, ასევე ხაზი უნდა გავუსვათ სუარესის „როხიბლანკოს“ რიგებში გადმოვლას. ორივე ფეხბურთელმა ჩვენი უშუალო კონკურენტების რიგები დატოვეს, საბოლოო ჯამში კი „ატლეტიკოს“ დაეხმარნენ წარმატების მიღწევაში.“

„მჯეროდა, რომ „რეალი“ ლორენტესთვის დაბრკოლება იყო. მას ვეუბნებოდი, რომ სამეფო კლუბი კარიერას დაუნგრევდა, „ატლეტიკოში“ კი თვალსაჩინო ფეხბურთელი გახდებოდა. ვფიქრობ, ასეც მოხდა და დღეს ლორენტე საკუთარ პოზიციაზე ერთ-ერთი ყველაზე ეფექტური ფეხბურთელია.“