რაფაელ ვარანის მადრიდის „რეალიდან“ წასვლის შემთხვევაში კლუბის ხელმძღვანელობა მის შემცვლელზე სერიოზულად დაიწყებს ზრუნვას.

ვრცელდება ინფორმაცია არაერთ კანდიდატურაზე, ახლა კი მადრიდული გრანდის ორბიტაზე კიდევ ერთი მცველი გამოჩნდა უესლი ფოფანას სახით, რომელიც „ლესტერის“ ღირსებას იცავს და შარშანდელ სეზონში საკმაოდ კარგი ფეხბურთი ითამაშა.

20 წლის მცველი, რომლის ფასი უკვე აღწევს 40 მილიონ ევროს, პრემიერლიგაში სულ ცოტა ხნის წინ გამოჩნდა, მაგრამ განსაკუთრებული სტაბილურობით გამოიჩინა თავი.

ფოფანა 190 სანტიმეტრია და შესანიშნავად თამაშობს მეორე სართულზე, ის შარშანდელ სეზონში მხოლოდ ინგლისის ჩემპიონატში 28-ჯერ გამოჩნდა მოედანზე.

უესლის ორმაგი მოქალაქეობა აქვს, ის ეროვნობით კოტდივუარელია, თუმცა მარსელში დაიბადა და საფრანგეთის მოქალაქეც გახლავთ.

„ლესტერ სიტისთან“ არსებული ხელშეკრულების მიხედვით, ფოფანა ინგლისში 2025 წლამდე უნდა დარჩეს, თუმცა ფაქტია, რომ ის უკვე მოექცა ევროპული გრანდების ყურადღების ცენტრში.