როგორც იცით, დავიდ ალაბამ და ავსტრიის ეროვნულმა ნაკრებმა, იტალიასთან მარცხის შემდეგ, ევროპის ჩემპიონატზე ასპარეზობა დაასრულეს.

დღეიდან, "რეალის" ახალწვეული კუთვნილი არდადეგებით ისარგებლეს და მხოლოდ 21 ივლისს ჩაფრინდება ესპანეთის დედაქალაქში, სადაც 5 ივლისს იწყება წინასასეზონო მომზადების პროცესი.

ალაბამ კონტინენტის პირველობაზე 4 შეხვედრა შეუცვლელად ჩაატარა. მის ანგარიშზეა 33 გამომუშავებული ბურთი, 10 მოგებული დუელი, 243 გადაცემა (83%-იანი სიზუსტით), 2 ასისტი და 48 ჩაწოდებული ბურთი მეტოქის საჯარიმოში. საგულისხმოა, რომ ჩამოთვლილ კომპონენტებში ავსტრიელი ერთ-ერთი საუკეთესოა ტურნირზე მონაწილე ფეხბურთელებს შორის. მისი განვლილი ბურთაობა შეიძლება შეფასდეს, როგორც წარმატებული.

ბუნებრივია, მისი სახით, სრულიად უფასოდ, "ბლანკოსმა" სერიოზული გაძლიერება მიიღო, მაგრამ ახლა მთავარ გამოწვევად რჩება მისი პოზიცია, რაც ერთგვარი დილემაა ანჩელოტისთვის.

დავიდმა საფეხბურთო კარიერა დაცვის მარცხენა ფრთაზე დაიწყო, თუმცა ბოლო პერიოდში დიდ დროს ატარებს ცენტრში. ამასთანავე, მას საყრდენის პოზიციაზეც ძალუძს ასპარეზობა. ევროპის ჩემპიონატზე კი ალაბა ხშირად იცვლიდა ამპლუას.

ჯერ-ჯერობით, უცნობია რას გეგმავს იტალიელი სპეციალისტი. როდესაც ისინი მიუნხენში მოღვაწეობდნენ, მოთამაშე ცენტრალური მცველის ფუნქციებს ირგებდა და დიდი ალბათობით, ასე იქნება მადრიდშიც. ნაკლებად სავარაუდოა, რომ სამწვრთნელო შტაბი ალაბას მენდისა და მარსელოს კონკურენტად მოიაზრებდეს.

სერხიო რამოსის წასვლის შემდეგ, "რეალის" მთავარ პრობლემას სწორედ მისი დანაკლისის აღმოფხვრა წარმოადგენს.

AS