ევროპის ჩემპიონატის პარალელურად, საკმაოდ დაძაბული სიტუაციაა მიმდინარე სატრანსფერო ფანჯარაზეც.

როგორც იცით, ამ ეტაპისათვის, რაფაელ ვარანი (2022 წლის ზაფხულში ეწურება მოქმედი ხელშეკრულება) სამეფო კლუბიდან წასვლასა და ახალი გამოწვევის მიღებაზე ფიქრობს. ფრანგი ცენტრალური მცველის ერთ-ერთი მთავარი მსურველი „მანჩესტერ იუნაიტედია,“ რომელმაც მადრიდელებს ვარანისა და პოგბას გაცვლა შესთავაზა. ეს ყველაფერი კი იმიტომ, რომ „წითელ ეშმაკებს“ ფეხბურთელში 70 მილიონი ევროს გადახდა არ ძალუძთ.

საინტერესოა, რომ „სანტიაგო ბერნაბეუზე“ ინგლისელების წინადადებას ნეგატიური გამოხმაურება მოჰყვა. „რეალი“ მხოლოდ გარკვეული თანხის მიღების სანაცვლოდ აპირებს ვარანის დათმობას და ამასთანავე, მათ ინტერესებში სულაც არ შედის პოლ პოგბა. არადა, ამ უკანასკნელის ოცნებაა თეთრი მაისურის მორგება.