მადრიდის „რეალის“ ინსტიტუციონალური ურთიერთობების დირექტორმა, ემილიო ბუტრაგენიომ სეზონი შეაფასა და მნიშვნელოვან საკითხებზე ისაუბრა.

„პირველ რიგში ვულოცავ მადრიდის „ატლეტიკოს“. დიეგო სიმეონეს გუნდმა დიდი ბრძოლის შედეგად მოიპოვა ლა ლიგის თასი. ეს ძალიან რთული წელი იყო და ვამაყობ, რომ „რეალის“ ფეხბურთელებმა ბოლომდე იბრძოლეს.“

„დღევანდელი თამაში მთელი სეზონის კარგი ანარეკლი იყო. ჩვენ ვიხილეთ უშეღავათო ბრძოლა, სადაც „რეალი“ არასდროს ნებდება და ხშირ შემთხვევაში წარმატებას აღწევს.“

„მადრიდში არსებობს მთელი რიგი ფასეულობებისა, რომელიც თაობიდან თაობას გადაეცემა. ჩვენ არასდროს ვღალატობთ ტრადიციებს და არ ვცვლით გეზს. არავითარი საყვედური არ გვაქვს ფეხბურთელების მიმართ, ისინი მთელი სეზონის მანძილზე უშეღავათოდ იბრძოდნენ და უამრავი ტრავმის მიუხედავად, ურთულეს მატჩებს იგებდნენ.“

„სერხიო რამოსის და ზიდანის მომავალი? ამ თემასთან დაკავშირებით დამატებით მოგვიწევს საუბარი.“

„ჩვენი გულშემატკივრები ვირტუალურად გვიჭერდნენ მხარს. დიდი იმედი მაქვს, რომ მომდევნო სეზონს მათთან ერთად დავიწყებთ და სტადიონი გაივსება.“

„კიდევ ერთხელ ვუსამძიმრებ არნაუს ოჯახს, ეს დიდი დარტყმა იყო საფეხბურთო სამყაროსთვის.“