ზინედინ ზიდანმა „სევილიასთან“ მატჩის შემდეგ პრესკონფერენცია გამართა და დაპირისპირების მნიშვნელოვანი პერიპეტიები მიმოიხილა...

„სამეფო კლუბის ყველა ფეხბურთელს მადლობა უნდა ვუთხრა, რადგან ჩვენ ვიხილეთ საოცარი ბრძოლა. ვთვლი, რომ გამარჯვებას ვიმსახურებდით, ვინაიდან უამრავი საგოლე მომენტის შექმნა შევძელით. დიახ, პირველი ტაიმი არ იყო სახარბიელო, მაგრამ მეორე 45 წუთში „ბლანკოსმა“ დინამიური, ტექნიკური, ტაქტიკურად გამართული და ზუსტი ფეხბურთი ითამაშა. 3 ქულის აქტივში ჩაწერა ჩვენი უმნიშვნელოვანესი მიზანი იყო, მაგრამ სამწუხაროდ, ეს ვერ მოვახერხეთ. ყველა შემთხვევაში შემიძლია გითხრათ, რომ „რეალის“ არცერთი ფეხბურთელი არ დანებდება და ლა ლიგისთვის ბრძოლაში ბოლომდე იქნება ჩართული. ჩვენ წინ კიდევ 3 ფინალი გვაქვს, რომლის მოგებასაც ვაპირებთ.“

„საკუთარ თავზე არ ვართ დამოკიდებულები, მაგრამ გვჯერა, რომ მომდევნო მატჩებში გამარჯვების შემთხვევაში შანსი გვექნება. ყველა ფეხბურთელმა იცის საკუთარი მოვალეობა და მჯერა, რომ ამ მატჩში მიღებული მუხტი ბოლომდე გაგვყვება.“

„პენალტზე საუბარს აზრი აღარ აქვს. მსაჯს მაშინვე ვუთხარი, რომ წესების მიხედვით ეს საკითხი საკამათოა. მჯერა, რომ ჩემი პოზიცია ზუსტია და შეცვლას არ ვაპირებ. მილიტაოს მომენტზე საუბარი ნამდვილად აღარ მსურს.“

„მეტის ღირსი ვართ. მერწმუნეთ, „რეალი“ იმსახურებდა გამარჯვებას და იმსახურებს ჩემპიონობას, სწორედ ამიტომ მოდუნების საშუალება არ გვაქვს.“

„ვენდობი თუ არა VAR სისტემას? მე ვენდობი ფეხბურთს, შესაბამისად ვენდობი მსაჯებს, მაგრამ დღეს ისინი მხოლოდ ჩვენს მომენტებს ხედავდნენ. კიდევ ერთხელ გეუბნებით, აღარ მსურს ამ საკითხზე საუბარი.“

„არ აქვს მნიშვნელობა ხუთშაბათს ვითამაშებთ, კვირას თუ სხვა დღეს. ჩემი გუნდის ამოცანა ლა ლიგის მოგებაა, ამიტომ მზად ვართ საბრძოლველად და გვჯერა, რომ მიზანს მივაღწევთ.“

„კროოსის ემოციები აბსოლუტურად გასაგები იყო. გერმანელს გასახდელში ვუთხარი, რომ ტაბლოზე ვეღარაფერს შევცვლით, ამიტომ უნდა დამშვიდდეს.“

„ლოპეტეგის გუნდმა პირველი გოლი რა თქმა უნდა დაიმსახურა, ვინაიდან საწყის წუთებში დომინირებდა და მომენტებიც შექმნა, თუმცა მას შემდეგ ამ გუნდს აღარაფერი დაუმსახურებია და მოედანზე დომინანტი „ბლანკოსი“ გახდა.“