არსენ ვენგერმა მადრიდის „რეალზე“ ისაუბრა და საკმაოდ თბილი განცხადებები გააკეთა...

„მე გავიზარდე ისეთი ლეგენდების თამაშის ყურების დროს, როგორებიც სანტამარია, კოპა, პუშკაში და სხვები იყვნენ. მადრიდის „რეალის“ თამაშების ყურება დიდი სიამოვნება იყო და ამ გუნდის წარმატებაზე ვოცნებობდი კიდეც. უნდა აღვნიშნო, რომ სანტიაგო ბერნაბეუ ქალაქის ცენტრთანაა ახლოს, რაც ხალხისთვის კიდევ უფრო დიდი შთაგონების წყაროა.“

„სამეფო კლუბის მწვრთნელობასთან ორჯერ ვიყავი ახლოს, მაგრამ „არსენალს“ ვერ ვუღალატე, ვინაიდან კლუბში გარდამტეხი ცვლილებები მიმდინარეობდა. დაინგრა „ჰაიბერი“ და შენდებოდა ახალი სტადიონი, რასაც უდიდესი ფინანსური რესურსი სჭირდებოდა. იმ ეტაპზე ფეხბურთელების ყიდვა ფაქტობრივად წარმოუდგენელი იყო, ჩემი თანამდებობიდან წასვლის შემთხვევაში კი „მეთოფეებს“ კრიზისი დაეწყებოდათ.“

„ფასეულობები, რომელსაც მწვრთნელები კლუბში ქმნიან უფრო მნიშვნელოვანია, ვიდრე მოგება და წაგება. ეს ჩემთვის უპირველესი კომპონენტი იყო ყოველთვის.“

„მსოფლიოს ტოპ კლუბების სათავესი დგომა შემეძლო, მაგრამ საბოლოო ჯამში „არსენალში დარჩენა ვარჩიე, რითიც ახლაც ვამაყობ. ცხოვრებში ბევრი ნაბიჯის გადადგმა გვიწევს, რომელთაგან ზოგიერთი სწორია, ზოგიერთიც მცდარი, მაგრამ მთავარი ყოველთვის ისაა, რომ იდენტობა შევინარჩუნოთ.“