ის, რომ „ხეტაფესთან“ სამეფო კლუბმა კარის მშრალად შენახვა მოახერხა, ტიბო კურტუას დიდი დამსახურება მიუძღვის. ბელგიელმა გოლკიპერმა განვლილი შეხვედრა ჟურნალისტებთან შეაფასა.

„სიმართლე გითხრათ, 1 ქულის მოპოვებით ცოტათი იმედგაცრუებულნი ვართ, ვინაინად გამარჯვების მოპოვება გვსურდა. საწყის 45 წუთში ბურთის კონტროლთან დაკავშირებით გარკვეული პრობლემები გვქონდა, რაც შესვენების შემდეგ გამოვასწორეთ, თუმცა მაინც ვერ მოვახერხეთ მეტოქის დამწუხრება. გამომდინარე იქედან, რომ მოედანი სველი იყო, ამან უფრო გაართულა ყველაფერი. მეორე ტაიმში რამდენიმე სეივის განხორციელება მომიხდა. ჩვენ მშრალად შევინახეთ კარი და ეს პოზიტიური მოვლენაა. პრიმერა დივიზიონის ტიტულისათვის ბრძოლა არ არის ადვილი.“

„განვლილ შეხვედრაში ახალგაზრდა მოთამაშეების დახმარება დაგვჭირდა. ბლანკო და არიბასი, რომლებმაც წინა დღით „კასტილიას“ რიგებში იასპარეზეს, კარგად გაისარჯნენ „ხეტაფეს“ წინააღმდეგაც. იგივეს თქმა შეიძლება ჩუსტიზეც, მან ნაყოფიერი წარმოდგენა შემოგვთავაზა. კარგი მოვლენაა, როდესაც აკადემიის მოთამაშეები ჩნდებიან პირველ გუნდში.“

„მიუხედავად იმისა, რომ ბევრი ტრავმირებული ფეხბურთელი გვყავს, ახლა ამის განხილვის დრო არ არის. ჩვენ ვართ მადრიდის „რეალი“ და უნდა ვიბრძოლოთ ბოლომდე.“

RealMadrid.Com