2019/2020 წლის სეზონი ყველაზე უსახური გამოდგა ნაჩო ფერნანდესის საფეხბურთო კარიერაში. ესპანელმა მცველმა ტრავმებისა და მწვრთნელის გადაწყვეტილების მიზეზით, მხოლოდ 10 მატჩში შეძლო მონაწილეობის მიღება.

განვლილი ზაფხულის სატრანსფერო ფანჯარაზე ბევრი იწერებოდა ნაჩოს „რეალიდან“ გადაბარგების შესახებ, თუმცა კლუბის ერთგულ ჯარისკაცს არც ერთი წამი არ უფიქრია დისლოკაციის შეცვლა. მიუხედავად იმისა, რომ ედერ მილიტაოს გამადრიდელების შემდეგ მისი სათამაშო წუთები მნიშვნელოვნად შემცირდა, ნაჩო მაინც სიმშვიდეს ინარჩუნებდა და ელოდებოდა შანსს.

ბოლო დროს განვითარებულმა მოვლენებმა კიდევ ერთხელ წარმოაჩინა, თუ რაოდენ შეუფასებელი ფეხბურთელია ფერნანდესი „რეალისათვის.“ მაშინ, როდესაც სეზონის მეტად მნიშვნელოვან მომენტში რამოსი და ვარანი ვერ ახერხებენ მწვანე მინდორზე გასვლას, „ექვსიანი“ ჩვეული დამაჯერებლობით იცავს გუნდის დაცვით ხაზს. მან საკმაოდ კარგი შთაბეჭდილება დატოვა, როგორც „ლივერპულთან,“ ასევე „ბარსელონასთან“ შეხვედრაში.

ნაჩო ერთადერთი ფეხბურთელია „რეალის“ მიმდინარე ფორმაციის რიგებში, რომელმაც უბრალოდ არ იცის რას ნიშნავს სხვა კლუბის ემბლების ქვეშ თამაში.

და ბოლოს, ალბათ, ყველას გვახსოვს მომენტი განვლილი პრიმერადან, როდესაც მან გამარჯვების გოლი გაიტანა „რეალ ვალიადოლიდის“ წინააღმდეგ, რის შემდეგაც ზიდანთან ერთად იზეიმა. იმ პერიოდში ფერნანდესი მწვრთნელის ნდობით ნამდვილად არ იყო გათამამებული, თუმცა აღნიშნული ჟესტით კანტერანომ ხაზი გაუსვა კლუბის მიმართ მის სიყვარულსა და დამოკიდებულებას.

MARCA

წარმატებები ვუსურვოთ ნაჩოს! ის მადრიდისტებში განსაკუთრებული პატივისცემით სარგებლობს.