სამეფო კლუბი საკმაოდ სოლიდური უპირატესობით აიღებს გეზს „ენფილდისკენ,“ თუმცა აღსანიშნავია, რომ ზიდანი მეტად სერიოზული საკადრო პრობლემების წინაშე დგას.

სამწუხაროდ, „ელ კლასიკოს“ შემდეგ, ტრავმირებულთა რიგებს შეუერთდა ლუკას ვასკესიც, რომელიც წარმატებით ცვლიდა ასევე ლაზარეთში მყოფ დანი კარვახალს. ესპანელმა შემტევმა ბუსკეცთან შეჯახების შემდეგ თამაშის გაგრძელება ვეღარ შეძლო და როგორც იტყობინებიან, მისთვის მიმდინარე სეზონი უკვე დასრულებულია.

შესაბამისად, „ლივერპულთან“ მეორე მეოთხედფინალური შეხვედრის წინ, ზიდანის თავსატეხი გაძლიერებულია. რა თქმა უნდა, შემადგენლობაში ირიცხება ამპლუით მარჯვენა მცველი ოდრიოსოლა, მაგრამ ფრანგი მწვრთნელი „რეალ სოსიედადის“ აღზრდილს არ ენდობა. ეს ბუნებრივიცაა, ვინაიდან, ალვარომ ვერადავერ მოახერხა „რეალის“ მაისურით ნაყოფიერი თამაშის ჩვენება.

ესპანურ პრესაში ვარაუდობენ, რომ თუ ფედერიკო ვალვერდე თამაშამდე მოასწრებს მიკრო დაზიანების მოშუშებას, ზიდანი სწორედ მას ჩააბარებს დაცვის მარჯვენა ფლანგს, როგორც ამას დიეგო სიმეონე ლორენტეს შემთხვევაში აკეთებდა, როდესაც ტრიპიერს არ შეეძლო ბურთაობა.

ამასთანავე, ერთ-ერთ ვარიანტად განიხილება ე.წ. 5 მცველიანი ტაქტიკა. უფრო კონკრეტულად, კურტუას პირდაპირ ადგილს დაიკავებენ მილიტაო, ნაჩო და მენდი, ხოლო მათზე წინ განლაგდებიან მარსელო და ოდრიოზოლა.

მაშასადამე, ზინედინ ზიდანს სერიოზული გამოწვევა ელოდება ოთხშაბათს.

MARCA