„ელ კლასიკოს“ მოგებით განცდილი სიხარული მადრიდისტებს დიდხანს გაჰყვებათ, მაგრამ კატალონიელებთან მატჩში ზიდანმა ერთბაშად 4 ფეხბურთელი დაკარგა, რაც ისედაც ტრავმირებული ფეხბურთელების ფონზე სიტუაციის კიდევ უფრო ამძიმებს.

ნაჩო ფერნანდესმა ყვითელი ბარათი მიიღო, რომელიც რიგით მეხუთე გამოდგა. ლა ლიგაში არსებული წესების მიხედვით ყოველი მეხუთე გაფრთხილება ერთ გამოტოვებულ მატჩს ნიშნავს. ნაჩეტე დისკვალიფიცირებულია და „ხეტაფეს“ წინააღმდეგ თამაშს ვერ შეძლებს.

წითელი ბარათი მიიღო კაზემირომ და ზიდანის გუნდის დახმარებას ვერც ბრაზილიელი ფეხბურთელი შეძლებს.

ლუკას ვასკესის და სერხიო ბუსკეტსის შეჯახება მადრიდისტასთვის ფატალური შედეგით დასრულდა და ის მიმდინარე სეზონში მოედანზე ვეღარ გავა.

ჯერ-ჯერობით კვლავ ბუნდოვანია ვალვერდეს მდგომარეობა, მაგრამ ის გუნდთან ერთად ვერ ვარჯიშობს და დიდი ალბათობით აღდგენითი პროცესი დასჭირდება.

ყოველივე ზემოაღნიშნული იმის ფონზე ხდება, რომ ზინედინ ზიდანს დაცვის ცენტრში რამოსი და ვარანიც არ ჰყავს. გამოდის, რომ გუნდში მხოლოდ ერთადერთი ცენტრალური მცველია მილიტაოს სახით, მთავარ მწვრთნელს კი იმის საშუალებაც არ აქვს, რომ ედერს კაზემირო შეუწყვილოს. არ არის გამორიცხული ფრანგ სპეციალისტს „კასტილიელი“ მცველის გამოძახება მოუწიოს.

საბოლოო ჯამში „ხეტაფესთან“ მატჩში სამეფო კლუბს არ ეყოლება - ვასკესი, კარვახალი(მცირე შანსი მაინც არსებობს), ნაჩო ფერნანდესი, ვარანი, რამოსი, კაზემირო, ვალვერდე და ედენ აზარი.

შეგახსენებთ, ლა ლიგის 31-ე ტურს „მერენგები“ „ხეტაფეს“ წინააღმდეგ გამართავენ. მატჩი 18 აპრილით არის დათარიღებული.