მარიანო დიასი შესაძლოა „სევილიაში“ აღმოჩნდეს. ჟულიენ ლოპეტეგი ენ ნესირის შესაძლო გაყიდვის საკითხს განიხილავს და თვლის, რომ მარიანოს სახით მის კარგ შემცვლელს დაიმატებს.

ანდალუსიელები ზაფხულში სამეფო კლუბთან მოლაპარაკებების წარმოებას დაიწყებენ. „სევილიას“ დიასის დამატება მაშინაც სურდა, როდესაც ფორვარდი „ლიონის“ ღირსებას იცავდა, მაგრამ ფეხბურთელმა ანდალუსიას მადრიდი არჩია.

ფაქტია, რომ ზიზუ მარიანოს მხოლოდ უკიდურეს სიტუაციაში ენდობა და მისი წასვლა სავსებით რეალურია.

ესპანური გამოცემების ცნობით, თუ პერესს დიასის სანაცვლოდ 20-22 მილიონ ევროს შესთავაზებენ, ფორვარდის კლუბის შეცვლა გარდაუვალი იქნება.