ტიბო კურტუამ მადრიდის „რეალის“ ოფიციალურ ვებ-გვერდს ესპანეთის სუპერთასის ნახევარფინალის წინ ინტერვიუ მისცა...

„შარშანდელი სუპერთასის გათამაშება ძალიან კარგად მახსოვს, ჩვენ მაშინ პოზიტიური ემოციები დაგვეუფლა, ძალიან ბევრი ვიშრომეთ და ვიბრძოლეთ, რამაც საბოლოო ჯამში ტიტული მოგვიტანა. ვფიქრობ, წარმატებაში დიდი წვლილის შეტანა შევძელი.“

„მეკარეთა დაფასება ხშირად არ ხდება, მაგრამ კარს საიმედო ადამიანი არ დარაჯობს, გუნდს ხშირად ექმნება საფრთხე. გაიხსენეთ არიენ რობენისა და იკერ კასილიასის მომენტი. მაშინ რომ ჰოლანდიელს გაეტანა და ესპანელ ლეგენდას „სეივი“ არ გაეკეთებინა, ვითარება რადიკალურად განსხვავებული იქნებოდა და ესპანეთი ჩემპიონობას ვერ შეძლებდა.“
„ვარჯიშებზე ძალიან ბევრს ვშრომობ, გარკვეულ ასპექტებში პრობლემები მექმნება ხოლმე, ვინაიდან 2 მეტრი ვარ და რა თქმა უნდა ისე გადაადგილება არ შემიძლია, როგორც გაცილებით დაბალ ფეხბურთელებს, თუმცა ეს კომპონენტი ბევრ რამეში მეხმარება კიდეც.“

„სამეფო კლუბში თამაშზე ყოველთვის ვოცნებობდი. დიდი ხანი არ არის, რაც „მერენგების“ სადარაჯოზე ვდგავარ, მაგრამ უკვე შემიძლია ბევრი ლამაზი მომენტის გახსენება.“
„ჩვენ ყოველთვის ვუყურებთ მეტოქის ვიდეოებს და ხშირად ვსწავლობთ ბევრ რამეს. მოწინააღმდეგის შეფასება ყოველთვის მნიშვნელოვანი კომპონენტია, თუმცა მერწმუნეთ, ის რაც ტელევიზორიდან სჩანს, მოედანზეც იგივე არ არის. სივრცეები ხშირად სხვაგვარად აღიქმება, აქედან გამომდინარე, ყველაზე მნიშვნელოვანი მაინც გადამწყვეტ მომენტში სწორი პოზიციის დაჭერაა.“

„შესაძლოა 90 წუთის მანძილზე კარგად ითამაშო, მაგრამ ბოლოს ერთი შეცდომა დაუშვა, რასაც შეუძლია ტაბლოზე ყველაფერი შეცვალოს და გუნდი წაგებამდე მიიყვანოს. ამიტომ ყველა მეკარეს, ისევე როგორც წინ მოთამაშე ფეხბურთელებს ევალებათ, რომ კონცენტრაცია არასდროს დაკარგონ და მუდმივად მობილიზებულები იყვნენ.“

„შარშან „ატლეტიკოსთან“ ვითამაშეთ და ყველაფერი 90 წუთში არ გადაწყდა. იმ დერბიში უამრავი „სეივი“ დაფიქსირდა, როგორც ჩემი, ასევე „როხიბლანკოს“ მეკარის მხრიდან. ბევრი მომენტი იყო, რომელიც ესპანური ფეხბურთის ისტორიას დარჩა. საკმაოდ დაძაბული დაპირისპირება გამოდგა, თუმცა ქომაგებმა დიდი სიამოვნება მიიღს.“

„მსურს, რომ ესპანეთის სუპერთასის მოგება კიდევ შევძელოთ, ამისთვის ჯერ „ბილბაოს“, შემდეგ კი ფინალისტის დამარცხებაა საჭირო.“

„კარგად მახსოვს „ბარსელონასთან“ მოგებული 2-0, ასევე 1-3, არასდროს დამავიწყდება „ბეტისისა“ და „ვილიარეალის“ წინაააღმდეგ გამართული დრამატული დაპირისპირებები, სადაც მნიშვნელოვანი გამარჯვებები ჩავიწერეთ აქტივში. მნიშვნელოვანი იყო „ბილბაოსთან“ დაფიქსირებული 3-1 და ასე შემდეგ.“

„ვიმედოვნებ, სუპერთასის ნახევარფინალი და შემდგომ ფინალი ჩემს მეხსირებაში სამუდამოდ ჩაიბეჭდება, როგორც ძალიან ლამაზი და მნიშვნელოვანი მატჩები.“