ლა ლიგის შესაბამისმა კომიტეტმა დანიელ კარვახალის ქცევის შესწავლა დაიწყო. ესპანელმა ფეხბურთელმა ლა ლიგის გასულ ტურში, შეცვლის დროს განგებ დააყოვნა, რათა მსაჯისგან ყვითელი ბარათი მიეღო.

ეს გახლდათ რიგით მეხუთე გაფრთხილება და როგორც სჩანს, დანი დავალებას ასრულებდა და „ოსასუნასთან“ მატჩისთვის დისკვალიფიკაციის მიღებას სპეციალურად ცდილობდა.

ზიზუმ მატჩის მიწურულს ესპანელი შეცვალა, მაგრამ დანი მოედანს ძალიან დიდი ხნის მანძილზე არ ტოვებდა და მაშინვე შეიქმნა შთაბეჭდილება, რომ ის ამას განგებ აკეთებდა და ყვითელ ბარათს ელოდებოდა.

„მარკას“ ინფორმაციით, კომიტეტი გადაწყვეტილებას ძალიან მალე მიიღებს და თუ ვარაუდი გამართლდება, კარვახალი არა ერთი, არამედ ორი მატჩით დაისჯება.