ზინედინ ზიდანმა „გრანადასთან“ მატჩის შემდეგ პრესკონფერენცია გამართა.

„დამსახურებულ გამარჯვებას მივაღწიეთ. ზედიზედ 6 თამაშის მოგება მარტივი არ არის, მაგრამ ვალდებულები ვიყავით 3 ქულა ჩაგვეწერა აქტივში. ჩვენი მიზანი ლა ლიგის მოგებაა.“

„პირველი ტაიმი ძალიან რთული იყო, ხოლო მეორე ბევრად უკეთესი, რამაც საბოლოო ჯამში კარგი შედეგები მოგვცა.“

„თამაშამდეც ვამბობდი, რომ იოლი დაპირისპირება არცერთ შემთხვევაში არ გვექნებოდა.“

„წარმატების გასაღები ინტენსივობის მომატება და ტემპი გახლდათ. ძალიან მნიშვნელოვანი იყო, რომ სწრაფად მიგვეღო გადაწყვეტილებები.“

„კაზემირო თავით ძალიან მაღალ დონეზე თამაშობს, ის ეფექტურია, როგორც საკუთარ პოზიციაზე, ასევე დაცვასა და წინა ხაზში. ბრაზილიელი ხშირად მახსენებს სერხიო რამოსს და რაფაელ ვარანს, რომლებიც მეორე სართულზე ბრწყინვალეები არიან.“

„2021 წელს ძალიან დიდი გეგმები გვაქვს და ყველას ვუსურვებ, რომ დასახულ მიზნებს მიაღწიოს. ფეხბურთელებმა იციან რა მიზანი გვაქვს და ყველაფერს გააკეთებენ წარმატების მისაღწევად.“

„აზარმა არ ითამაშა, რადგან ამის საჭიროება არ დამდგარა, ბელგიელთან დაკავშირებით არ გავრისკე.“

„ისევ როტაციაზე მეკითხებით? მე გპასუხობთ იგივეს, ცვლილებები აუცილებლად იქნება.“

„სეზონი ძალიან გრძელია და უნდა ვეცადოთ, რომ არსებულ გეზს არ გადავუხვიოთ და წარმატებული სვლა განვაგრძოთ.“

„ყველა მატჩს რა თქმა უნდა ვერ მოვიგებთ, თუმცა მაქსიმუმი უნდა გავიღოთ.“

„ფეხბურთელების მხრიდან დიდ მხარდაჭერას ვგრძნობ, ისინი გვერდში რთულ მომენტში დამიდგნენ და ასე იქნება მომავალშიც, თუმცა არასდროს ვითვალისწინებდი კრიტიკოსების უაზრო პოზიციებს. თუ მწვრთნელის თანამდებობის დატოვება მომიწევს, ამას ნებისმიერ დროს გაგებით მოვეკიდები.“