ზინედინ ზიდანმა მადრიდული დერბის შემდეგ პრესკონფერენცია გამართა. ფრანგი სპეციალისტი შეხვედრის შემდეგ ძალიან ბედნიერი იყო.

„ეს თამაში ჩემთვის ძალიან ბევრს ნიშნავდა. იცით რატომ? იმიტომ, რომ ჩემმა გუნდმა პირველიდან ბოლო წუთამდე იბრძოლა „ატლეტიკოსთან“, რომელსაც 26 მატჩი არ ჰქონდა წაგებული და ამ სეზონში ბრწყინვალე მაჩვენებლებს აფიქსირებდა. ძალიან ბედნიერი ვარ. დაპირისპირების შემდეგ დიეგომ ხელი ჩამომართვა მე კი მას ვუთხარი, რომ შესანიშნავი გუნდი ჰყავს და მაღალი მიზნებისთვის ბრძოლა, როგორც ლა ლიგაში, ასევე ევროსარბიელზე სავსებით შესაძლებელია.“

„ნამდვილად გვაქვს ბედნიერების და კმაყოფილების საფუძველი, ვინაიდან ვთვლი, რომ სეზონის დაწყებიდან დღემდე გასული კვირა ყველაზე რთული იყო. ჩვენ ანდალუსიაში მძიმე მატჩი მოვიგეთ „სევილიასთან“, ასევე ბრწყინვალე გამოსვლა გვქონა „გლადბახთან“, ახლა კი აბსოლუტური უპირატესობით დავამარცხეთ „ატლეტიკო“. ვფიქრობ, მისია შესრულებულია, რაც კმაყოფილების საფუძველს გვაძლევს.“

„კარი მშრალად შევინახეთ და ეს პირველად არ მომხდარა. ერთადერთი მომენტი, რომელიც მახსენდება საულის დარტყმა იყო. სხვა მხრივ, ჩემმა ბიჭებმა აბსოლუტური სიზუსტე გამოიჩინეს. ჩვენ შესანიშნავად ვთამაშობდით, როგორც ბურთით, ასევე მის გარეშე. დაცვის ხაზი მოწოდების სიმაღლეზე იდგა.“

„როტაცია გარდაუვალია. მოთამაშეები ბევრს ვარჯიშობენ და იბრძვიან შემადგენლობაში მოსახვედრად. კალენდარიდან გამომდინარე, აუცილებელია ცვლილებები, სხვა შემთხვევაში ფეხბურთელთა გადაღლა მოხდება, რაც ჩემს გეგმებში არ შედის.“

„ფეხბურთელებს მტკიცე ხასიათი აქვთ და იციან, რას ემსახურებიან, ეს ამბავი ყველაზე მეტად მახარებს. კრიტიკული სიტუაციიდან არაერთხელ გამოვსულვართ.“

„კროოსი, კაზემირო და მოდრიჩი ზუსტად იმ დონეზე ასპარეზობენ, როგორც მაშინ „რეალი“ რომ სამი წლის განმავლობაში ჩემპიონთა ლიგას იგებდა. ამ ფეხბურთელებთან მუშაობა დიდ იმედს მაძლევს.“