სერხიო რამოსი სულ მალე მსოფლიო რეკორდს დაამყარებს, ეს მართლაც უპრეცენდენტო შემთხვევა იქნება.

„რეალის“ კაპიტანი ამ ეტაპზე ესპანეთის ნაკრებთან ერთად არის და დიდი ალბათობით 3 მატჩში მიიღებს მონაწილეობას. სულ რაღაც 1 მატჩი და ესპანელი ჯიჯი ბუფონის მაჩვენებელს გაუტოლდება, რომელიც კარის დარაჯს იტალიის ნაკრებში აქვს დაფიქსირებული. ჯანლუიჯი ნაკრებში 177 მატჩს მოითვლის, რამოსი კი 176-ს.

თუმცა ეს ყველაფერი არ არის. ჩატარებული სანაკრებო მატჩების მხრივ მსოფლიო ლიდერი აჰმედ ჰასანია, რომელმაც კარიერა 2012 წელს დაასრულა და საბოლოო მაჩვენებელი 184 მატჩი გახლავთ.

რამოსს სჭირდება 8 მატჩის ჩატარება იმისათვის, რომ რეკორდი გაიმეოროს, 9 მატჩი კი აბსოლუტურ რეკორდს და ისტორიაში ახალი ფურცლის გადაშლას ნიშნავს.

ეჭვი არავის ეპარება, რომ „რეალის“ კაპიტანი „ფურია როხას“ მაისურს მინიმუმ 9-ჯერ მოირგებს და მსოფლიო რეკორდის ავტორი გახდება.