ესპანური გამოცემების ინფორმაციით, მადრიდის „რეალში“ საკმაოდ მოულოდნელი ამბები ფიქსირდება.

საქმე ეხება სერხიო რეგილონს, რომელიც „სევილიაში“ ასპარეზობს და საიჯარო ხელშეკრულების 1 წელი უკვე დასრულებული აქვს.

მოქმედი შეთანხმების მიხედვით, სერხიომ ანდალუსიელთა რიგებში მომდევნო სეზონშიც უნდა ითამაშოს, 2021 წლის ზაფხულში კი ზიდანის გუნდში დაბრუნდეს.

როგორც სჩანს, ფლორენტინო პერესი ასე არ ფიქრობს და აშრაფ ჰაკიმის შემდეგ, ესპანელი მცველის გაყიდვაზეც დაიწყო ზრუნვა.

ერთი შეხედვით, რეგილონის 2021-ში დაბრუნება მარცხენა ფლანგზე ყველა პრობლემის მოხსნას ნიშნავდა, ვინაიდან ადრე თუ გვიან მარსელო წავა, რეგილონისა და მენდის სახით კი მთავარ მწვრთნელს დიდი რესურსი ექნებოდა.

ესპანური გამოცემების ცნობით, იმ შემთხვევაში, თუ პერესი საინტერესო წინადადებას მიიღებს, რეგილონის გაყიდვა გარდაუვალი იქნება. სამეფო კლუბის ხელმძღვანელობა სერხიოს დაახლოებით 32 მილიონ ევროდ აფასებს.

ამასთან ერთად Bernabeudigital იუწყება, რომ გადაწყვეტილება იმ ეკონომიკური კრიზისიდან გამომდინარეობს, რომელიც კლუბში პანდემიის შედეგად დადგა. 3 თვის განმავლობაში „მერენგების“ ზარალმა 180 მილიონ ევროს გადააჭარბა.