სერხიო რამოსისთვის „მალიორკასთან“ დაპირისპირება დაუვიწყარია...

გარდა იმისა, რომ კაპიტანმა ბრწყინვალე გოლი გაიტანა და გუნდის გამარჯვებაში უდიდესი წვლილი შეიტანა, მან ესპანეთის ლა ლიგაში მე-300 გამარჯვება დააფიქსირა.

გარდა ამისა საქმე გვაქვს პირად რეკორდთან, რომელიც ერთ სეზონში გატანილი გოლების რაოდენობას უკავშირდება. ესპანელმა აქტივში უკვე მე-8 გოლი ჩაიწერა, მისი საუკეთესო მაჩვენებელი კი 7 ბურთი გახლდათ.

კიდევ ერთი სიახლე ისაა, რომ რამოსს აქვს შანსი ლა ლიგის ისტორიის რეკორდიც დაამყაროს მცველებს შორის. საქმე იმაშია, რომ ერთ სეზონში ყველაზე მეტი გოლი ყოფილი მადრიდისტას, ეზეკილ გარაის ანგარიშზეა (9 გოლი), თუმცა არგენტინელმა აღნიშნული რაოდენობის ბურთების გატანა სანტანდერის „რასინგში“ ასპარეზობის დროს მოახერხა.

იმ შემთხვევაში, თუ სერხიო კიდევ გაიტანს, რეკორდს გაიმეორებს. ხოლო 2 ბურთის შეგდების შემთხვევაში საქმე ისტორიის ახალ ფურცელთან გვექნება.