დანი სებალიოსთან დაკავშირებით შეთანხმება მიღწეულია...

მადრიდის „რეალისა“ და „არსენალის“ საიჯარო ხელშეკრულების მიხედვით, დანი სებალიოსი 2020 წლის 30 ივნისს „მეთოფეთა“ მხრიდან ყველანაირი ვალდებულებისგან თავისუფლდებოდა.

წესით და რიგით, ესპანელი ფეხბურთელი 6 დღეში მადრიდში უნდა ჩამოსულიყო, თუმცა პრემიერლიგა ჯერ არ დასრულებულა და რამდენიმე კვირა არც დასრულდება.

„არსენალის“ ხელმძღვანელობამ „ბლანკოსს“ საიჯარო ხელშეკრულების 1 თვით გახანგრძლივებასთან დაკავშირებით მიმართა და მიზეზად სეზონის შეჩერება დაასახელა.

ფლორენტინო პერესის გადაწყვეტილებით, „მეთოფეები“ სებალიოსს კიდევ 1 თვით დაიტოვებენ და ამ საკითხზე შეთანხმება მიღწეულია.

დანი არის ჯერ-ჯერობით პირველი ფეხბურთელი, რომელსაც იჯარის ვადა 30 ივნისს ეწურება, მაგრამ საკუთარი მომავლის შესახებ იცის. გარდა ესპანელისა „ბლანკოსს“ რამდენიმე მოთამაშე ჰყავს განათხოვრებული, მათ შორის ოდრიოზოლაც, რომელთან დაკავშირებით ჯერ-ჯერობით ახალი ცნობები არ არსებობს.