ესპანური Defensacentral იუწყება, რომ მადრიდის „რეალმა“ დავიდ ალაბას შეძენა გასული წლების მანძილზე 3-ჯერ სცადა, მაგრამ ამაოდ.

აღსანიშნავია ერთ-ერთი მოლაპარაკების დეტალები, როდესაც „ბაიერნი“ მოთამაშის სანაცვლოდ 90 მილიონ ევროს ითხოვდა, ფლორენტინო პერესმა კი ამ თანხის გაგების შემდეგ ყოველგვარი მოლაპარაკებები შეაჩერა და გერმანულ მხარეს აცნობა, რომ საკითხი დახურულია.

ახლა ვითარება რადიკალურად არის შეცვლილი. ალაბას კონტრაქტი „რეკორდმაისტერთან“ 2021 წლის ივნისში იწურება, ახალ ხელშეკრულებაზე შეთანხმება კი ვერ ხერხდება, რაც იმას ნიშნავს, რომ გერმანულმა კლუბმა ავსტრიელი მცველი ამ ზაფხულს უნდა გაყიდოს.

ახლა ალაბას ფასი გაცილებით ნაკლებია და „რეალიც“ კვლავ ჩაერთო საქმეში. მადრიდში იმედი აქვთ, რომ მეოთხე მცდელობა წარმატებით ჩაივლის და დავიდი მადრიდისტა გახდება, თუმცა საქმე არც აქ იქნება მარტივად, ვინაიდან მარცხენა მცველზე პრეტენზიას პეპ გუარდიოლაც აცხადებს.