გავრცელებული ინფორმაციით, ზინედინ ზიდანის ერთ-ერთი საყვარელი ფეხბურთელი „რეალიდან“ წასვლის გადაწყვეტილებას იღებს...

საქმე ლუკას ვასკესს ეხება. ჯერ კიდევ 1 თვის წინ ვრცელდებოდა ინფორმაცია იმის შესახებ, რომ ვასკესი „მერენგებთან“ კონტრაქტს გაახანგრძლივებდა, თუმცა ესპანელმა ფეხბურთელმა არსებული ვითარება შეაფასა და მიხვდა, რომ შანსი აღარ რჩება.

აზარი და ასენსიო მალე გამოჯანმრთელდებიან, სულ უფრო მეტად გამოცდილები და სახიფათოები ხდებიან როდრიგო გოეში და ვინისიუს ჟუნიორი. ამ ყველაფრის ფონზე კი „ბლანკოსი“ ისევ შემტევებს ეძებს, სახელდება ბევრი კანდიდატურა ჟეიდონ სანჩოს, კილიან მბაპეს, სადიო მანესა და სხვების სახით. რომელიმეს დამატების შემთხვევაში ვასკესის შანსი ფაქტობრივად ნულის ტოლი გახდება.

ესპანურ გამოცემებზე დაყრდნობით, ლუკასს 2 შეთავაზება აქვს და განხილვას აპირებს, მისთვის პრიორიტეტული მოედანზე ხშირად გასვლა და შესაძლებლობების დემონსტრირება იქნება, ამას კი „მერენგების“ რიგებში დიდი ალბათობით ვეღარ მოახერხებს.

დაველოდოთ მოვლენათა განვითარებას და ფეხბურთელის საბოლოო გადაწყვეტილებას.