ზინედინ ზიდანი გაჩერებას არ აპირებს და ფლორენტინო პერესისგან სრული მხარდაჭერა აქვს...

ზაფხულში „ბლანკოსში“ დიდი ცვლილებები იწყება. გამომდინარე იქედან, რომ კლუბს რამდენიმე მასშტაბური ფეხბურთელი დატოვებს, ახალი მოთამაშეების მოყვანა დიდ აუცილებლობას წარმოადგენს.

სამეფო კლუბის 3 უმთავრესი მიზანი კილიან მბაპე, სადიო მანე და ნ'გოლო კანტე იქნება. გარდა ამ მოთამაშეებისა „რეალი“ ოდეგორის დაბრუნებასა და დონი ვან დე ბეეკის გამადრიდელებაზეც იზრუნებს.

ვრცელდება ინფორმაცია, რომლის მიხედვითაც, ფლორენტინო პერესი 400 მილიონ ევროს მბაპეს, მანეს და კანტეს შესაძენად გამოყოფს და სატრანსფერო ფანჯრის გახსნისთანავე დაიწყებს მოლაპარაკებებს.

ამასთანავე ესპანური გამოცემები მიუთითებენ, რომ ამხელა თანხის დახარჯვის შემთხვევაში „მერენგებმა“ შემოსავალიც უნდა დააფიქსირონ, სხვა შემთხვევაში Fair Play-ს დარღვევისთვის დაწესებულ სანქციებს ვერ ასცდებიან, თუმცა დიდი პრობლემა არც ეს არის, ვინაიდან გუნდიდან ბეილის, მარიანო დიასის, ისკო ალარკონის, ხამესი როდრიგესის, ლუკა მოდრიჩისა და სხვა განათხოვრებული ფეხბურთელების საბოლოო გაშვება იგეგმება.