„რეალის“ ლეგენდარულმა ფეხბურთელმა, სტივ მაკმანამანმა სამეფო კლუბზე ისაუბრა.

„მე ვთვლი, რომ „რეალმა“ და „ბარსელონამ“ როლები გაცვალეს. ახლა სამეფო კლუბს მსოფლიოს საუკეთესო ნახევარდაცვა ჰყავს, ადრე კი ამ სტატუსს „ბარსელონა“ ფლობდა, როდესაც გუნდში ბუსკეტსი, ჩავი და ინიესტა თამაშობდა, მათ სულ მალე რაკიტიჩიც დაემატათ, რომელმაც ძალიან კარგად გაიარა ადაპტაცია კატალონიაში.არ მსურს დავივიწყო ფაბრეგასი, რომლისთვისაც „ბარსელონა“ უპირველესი იყო. ახლა ზიდანის განკარგულებაში კროოსის, კაზემიროს და მოდრიჩის სახით საუკეთესო ნახევარდაცვაა, ეს ფეხბურთელები ვალვერდესთან, ისკოსთან და სხვებთან ერთად შუა რგოლს კიდევ უფრო სოლიდურს ხდიან.“

„დღევანდელი „რეალის“ პრობლემა მართლაც იშვიათია. სამეფო კლუბს თავდასხმაში არასდროს უჭირდა. მახსენდება არაერთი თაობა, მაგრამ წინა ხაზში გუნდში ყოველთვის უდიდესი ვარსკვლავები იყვნენ. თამამად ვიტყვი, რომ 21-ე საუკუნის განმავლობაში „მერენგებს“ ასეთი სუსტი წინა ხაზი არ ჰყოლიათ. მახსენდება რაულისა და მორიენტესის დუეტი, ასევე რონალდო, ოუენი, ნისტელროი და სხვები.“

„ვფიქრობ, ყველაფერი კრიშტიანო რონალდუდან გამომდინარეობს, რომელმაც ბოლო 10 წლის განმავლობაში „რეალის“ შეტევის სრული სადავეები იგდო ხელთ, მაგრამ პორტუგალიელი უკვე დიდი ხანია „იუვენტუსის“ ღირსებას იცავს და „რეალს“ შეტევაში გარდაქმნა სჭირდება.“

„თუ სამეფო კლუბმა წინა ხაზის სერიოზულ გაძლიერებაზე არ იფიქრა, ცუდად დაასრულებს, ვინაიდან ძლიერ თავდასხმას ყოველთვის გადამწყვეტი როლი ენიჭება. მე ვთვლი, რომ „ბლანკოსის“ თავდასხმაში მინიმუმ 2 მაღალი ფეხბურთელის დამატებაა საჭირო, რომლებიც გარდატეხას შეიტანენ გუნდის შეტევით პოტენციალში. კარიმ ბენზემა? ის დიდებული ფორვარდია, მაგრამ შეხედეთ მის ასაკს. 2 წელიწადში ფრანგი უმაღლეს დონეზე ვეღარ იასპარეზებს, „თეთრებს“ კი ვინ ჰყავთ?“

„აუცილებლად უნდა გავამახვილო ყურადღება როდრიგო გოეშზე, ვინიციუს ჟუნიორსა და ლუკა იოვიჩზე, მაგრამ მათში ჯერ-ჯერობით მხოლოდ პერსპექტივა სჩანს. ჩამოთვლილთაგან არცერთს არ შეუძლია „რეალის“ ლიდერობა იკისროს და კრიშტიანო რონალდუს მაგივრობა გაწიოს.“

„სასურველი ფეხბურთელები? რა თქმა უნდა, კილიან მბაპეს დიდ პატივს ვცემ და ვთვლი, რომ ის „რეალს“ მოუხდებოდა, თუმცა არ ვთვლი, რომ „ბლანკოსს“ მხოლოდ მბაპე უშველის. წინა ხაზში სერიოზული ცვლილებებია საჭირო.“