ზინედინ ზიდანმა „სევილიასთან“ მატჩის შემდეგ პრესკონფერენცია გამართა...

„ის, რაც კაზემიროს შეუძლია, ყველას ნამდვილად არ შეუძლია, ბრაზილიელი შეტევაშიც შესანიშნავია. დღეს ბრაზილიელმა საოცარი მატჩი ჩაატარა და 3 ქულა მოგვაპოვებინა, ჩემპიონობისთვის შეუპოვარი ბრძოლა გრძელდება.“

„მსაჯების გადაწყვეტილებებში ჩარევას არ ვაპირებ, VAR სისტემა კი ნელ-ნელა იხვეწება და არბიტრებს სწრაფ რეაგირებაში ეხმარება. არ მსურს შევაფასო განვითარებული მოვლენები, თუმცა ის უნდა ითქვას, რომ არჩათვლილ გოლთან დაკავშირებით კითხვები არ უნდა არსებობდეს, აქ იყო დარღვევა და ამით ყველაფერი დასრულებულია.“

„მონჩის განცხადებები და პრეტენზიები? ეს მისი საქმეა. არ მაქვს უფლება ვისაუბრო იმაზე, რაც ანდალუსიური კლუბის წარმომადგენლობას ეხება. მე „რეალის“ მწვრთნელი ვარ და ჩემ კოლექტივზე ვსაუბრობ.“

„პირველ ტაიმში უკმაყოფილო ვიყავი, მაგრამ მეორე ნახევარში ყველაფერი დალაგდა. ჩვენ მოვიგეთ ურთულესი მატჩი ძალიან ძლიერი მეტოქის წინააღმდეგ. თუ ჩემპიონობა გვსურს აღებულ ტემპს არ უნდა გადავუხვიოთ და ყველაფერი გავაკეთოთ მატჩების მოსაგებად. ასეთი გამოწვევების მიღება და სათანადო პასუხი ძალიან მნიშვნელოვანია.“

„იმისათვის, რომ წარმატებას მივაღწიოთ, კარგი ფიზიკური მომზადებაა საჭირო, აქედან გამომდინარე, ბოლომდე ვიხარჯებით და ვცდილობდით, რომ ფეხბურთელთა კონდიციებზე ბევრი ვიზრუნოთ.“

„ბეილი ბოლომდე მზად არ იყო, აქედან გამომდინარე, უელსელი მოედანზე ვერ გავიდოდა.“

„მატჩის შემდეგ ლოპეტეგიმ მითხრა, რომ ჩემ გუნდს ჩემპიონობა შეუძლია, მე მას მადლობა გადავუხადე“

„ედერ მილიტაო მომავლის ფეხბურთელია. ბრაზილიელი ერთ-ერთი საუკეთესო ახალგაზრდა გახლავთ, მას უდიდესი პერსპექტივა აქვს. ედერმა მუშაობა უნდა განაგრძოს და შედეგებს თავად დაინახავს. მილიტაოს ბევრი ასპექტის დახვეწა შეუძლია, მან ბევრი უნდა ისწავლოს.“

„ის, რომ ვარანმა „ბლანკოსის“ რიგებში 300-ე მატჩი გამართა, ნამდვილად საამაყო და დასაფასებელია. მიხარია, რომ რაფას გამადრიდელებაში ჩემი წვლილი შევიტანე, თუმცა გადაწყვეტილების მთავარი მიმღები ჟოზე მოურინიო გახლდათ, რომელმაც მისი ტალანტი ირწმუნა და „ბლანკოსში“ გზა გაუხსნა.“