ახალგაზრდა ფეხბურთელმა მორიგი შესანიშნავი თამაში ჩაატარა.

თუ მიმდინარე სეზონის დასაწყისში მადრიდული სამყარო პოგბას ტრანსფერის ჩავარდნას განიცდიდა, ახლა ვითარება სხვაგვარია.ფედერიკო ვალვერდემ საიმედო და შთამბეჭდავი ასპარეზობის წყალობით, ფრანგი ვარსკვლავის გამადრიდელებასთან დაკავშირებით წარმოქმნილ ყველანაირ დებატს წერტილი დაუსვა.

ესპანეთს სუპერთასის ფინალურ დაპირისპირებაში, ზიდანმა კვლავ 5 ნახევარმცველიან ტაქტიკაზე გააკეთა არჩევანი.ცხადია, ფედეც ძირითად შემადგენლობაში დააყენა.ეს უკანასკნელი პასების სიზუსტით (85.9%) მხოლოდ კროოსსა და მოდრიჩს ჩამორჩა, ხოლო დაბრუნებული ბურთების რაოდენობით, ასევე გერმანელისა და კარვახალის დარი შედეგი აჩვენა - 9.

რომ არა უიღბლობა, სამხრეთ ამერიკელი 65-ე წუთზე გოლსაც გაიტანდა, თუმცა მეორე დამატებითი ტაიმის მიწურულს, მაინც ჩაიდინა პატარა გმირობა.ალვარო მორატას მეკარესთან ერთი-ერთზე დარჩენა არ აპატია და მყისვე აიღო წითელი ბარათი, რითაც გუნდი პოტენციური გოლისგან იხსნა.

ვალვერდეს წარმატებული გამოსვლა არც ცნობილ Transfermarkt.com-ს გამორჩა.ზაფხულის შემდეგ, მისმა სატრანსფერო ღირებულებამ 150%-ით მოიმატა და ახლა 50 მილიონ ევროს აღწევს.

როგორც იცით, „რეალმა“ 2016 წელს, „პენიაროლიდან“ შეიძინა ფედე 5 მილიონ ევროდ. „კასტილიასა“ და „დეპორტივოში“ მაღალ დონეზე თამაშის წყალობით, მას „რეალის“ პირველი შემადგენლობისკენაც გაეხსნა გზა და შედეგები სახეზეა - ის „ბლანკოსის“ წამყვან ფიგურად ყალიბდება.

AS