როდრიგო;„დღევანდელი დღე ჩემ ცხოვრებაში საუკეთესოა“
როდრიგო გოეშმა „რეალის“ ფეხბურთელის რანგში პირველი პრესკონფერენცია გამართა...
„ყოველთვის ვამბობდი და ახლაც ვამბობ, რომ ოცნებების ახდენა შესაძლებელია. მე ვარ რიგითი ბრაზილიელი, რომელიც „ბლანკოსში“ თამაშზე ოცნებობდა. ეს ბრაზილიელი ბიჭების უმრავლესობის ოცნებაა.“
„ვინიციუს ჟუნიორს ეროვნულ ნაკრებში ყოფნის დროს ხშირად ვესაუბრებოდი „მერენგებში“ თამაშზე. ძალიან მაინტერესებდა მადრიდული სიტუაცია, ის ყველაფერს აკეთებდა იმისათვის, რომ ყველა ინფორმაცია ხელმისაწვდომი ყოფილიყო. მსურს, რომ მთავარ გუნდში ვიასპარეზო, მაგრამ ამ საკითხზე გადაწყვეტილებას ზიზუ მიიღებს.“
„ზიდანი დიდი ფეხბურთელი იყო და სამწვრთნელო საქმიანობაც შთამბეჭდავი აქვს. მიხარია, რომ ფრანგ ლეგენდასთან ვიმუშავებ.“
„წნეხი ყველა გუნდში არსებობს, მაგრამ მადრიდში არსებული ზეწოლა რა თქმა უნდა, ძალიან მაღალია. ვინიციუსი მეუბნებოდა, რომ აქ მოსვლის შემდეგ მშვიდად ვყოფილიყავი, ბევრი მემუშავა და აუცილებლად მივიღებდი შანსს. ვაპირებ ჩემი მეგობრის ყველა რჩევა გავითვალისწინო.“
„ბრაზილიელი ვარ და მიყვარს შეტევა, ტექნიკის დემონსტრირება, კარგი დარტყმა, ფლანგიდან სწრაფი შესვლები და ასე შემდეგ. მომწონდა რობინიოს სტილი, ასევე ნეიმარის და სხვების, თუმცა ბევრი მაქვს სამუშაო იმისათვის, რომ ამ ფეხბურთელების დონემდე მივიდე.“
„საუკეთესო პოზიცია? მარცხენა გარემარბად თავს ყველაზე კარგად ვგრძნობ, მაგრამ შემიძლია, როგორც მარჯვენა ფლანგზე, ასევე ფორვარდად თამაშიც.“
„ყოველთვის ვეცდები, რომ ყველა ასპექტი გავაუმჯობესო, ჩემთვის ძალიან მნიშვნელოვანია განვითარება, როგორც ტექნიკის, ასევე კარში დარტყმების და ფიზიკური თვალსაზრისით. მოთმინება და თავდაუზოგავი შრომა მმართებს. „რეალში“ მაღალი სტანდარტებია და მუდმივი პროგრესის გარეშე კლუბის მოთხოვნებს ვერ დააკმაყოფილებ.“
„მადრიდში პირველად გასულ ზამთარს ჩამოვედი, მაშინ კომუნიკაცია ვინიციუსთან, მარსელოსთან და კაზემიროსთან მქონდა. ჩემმა თანამემამულეებმა ბევრი რამ მირჩიეს, დღეს კი თანაგუნდელები ვართ. ბრაზილიური და ევროპული ცხოვრება როგორც სპორტული, ასევე სხვა ასპექტებში რადიკალურად განსხვავდება ერთმანეთისგან.“
„დიახ, „ბარსელონა“ კონტრაქტს მთავაზობდა, მაგრამ „რეალი“ ავირჩიე, რადგან მთელი ცხოვრება მადრიდში მსურდა თამაში, ეს ჩემი ოცნება იყო.“
„იჯარით წასვლა? არ ვფიქრობ, რომ ხელმძღვანელობა ჩემი იჯარით გაშვებას გეგმავს.“
„ჩემი კერპები? რობინიოზე და ნეიმარზე უკვე ვისაუბრე, ფენომენო ჩემთვის ეპოქალური მოთამაშე იყო, ასევე ყოველთვის მანცვიფრებდა რობერტო კარლოსი. ბრაზილიას არაერთი უმაღლესი კლასის ფეხბურთელი ჰყავდა, რომლებმაც წარუშლელი კვალი დატოვეს მსოფლიო ფეხბურთის ისტორიაში.“
„მსურს თუ არა ნეიმარი ჩემი თანაგუნდელი რომ იყოს? ის სხვა კლუბს ეკუთვნის და არ ვთვლი, რომ ჩემ თანამემამულეზე საუბრის დრო ახლა არის.“
„ვინიციუსს ნუ შემადარებთ, ჩვენ დაახლოებით ერთ სტილში ვთამაშობთ, მაგრამ ძალიან ბევრი გვაქვს სამუშაო იმისათვის, რომ დავიხვეწოთ და უფრო მაღალი დონის ფეხბურთელები გავხდეთ.“
„მზად ვარ თუ არა „რეალში“ სათამაშოდ? მე ვფიქრობ, რომ ვარ! სხვა შემთხვევაში „სანტოსში“ დავრჩებოდი და მუშაობას გავაგრძელებდი.“
„ესპანური ფეხბურთი ბრაზილიურისგან ძალიან განსხვავდება. ლა ლიგაში ტექნიკურ მხარეს გაცილებით დიდ უპირატესობას ანიჭებენ, ასევე იშვიათად ვხედავთ კონტაქტს და უხეშ თამაშს.“
„რასაც ახლა გეტყვით ალბათ არ დაიჯერებთ, მაგრამ ჩემსა და „რეალს“ შორის შეთანხება 20 წუთში შედგა. აგენტი ყველაფერში ჩართული იყო და ჩვენ არაფერზე დავფიქრებულვართ.“
- 18 ივნისი 2019
- 4 860
- 12
ინფორმაცია
ჯგუფ სტუმარი-ის წევრებს არ აქვთ კომენტარის დატოვების უფლება.
